काठमाडौं । कृषि तथा पशुपक्षी विकासमन्त्री रामनाथ अधिकारीले कृषि विकास रणनीतिलाई समयानुकूल परिमार्जन गर्न जरुरी रहेको बताएका छन् । उनले मुलुक सङ्घीयतामा जानुअघि लागू गरिएको रणनीतिलाई संघीयताअनुकूल परिमार्जन गरिनुपर्ने बताएका हुन् ।

कृषि विकास रणनीति कार्यान्वयन समीक्षा र परिमार्जनका लागि काठमाडौंमा आयोजित अन्तक्र्रियामा मन्त्री अधिकारीले जीविकोपार्जनका लागि कृषिकर्म गर्नेहरूलाई पनि व्यावसायिक कृषिमा ल्याउन सक्नेगरी कृषि विकासको रणनीति परिमार्जन आवश्यक रहेकामा जोड दिए । संघीयता लागू भइसकेपछि कृषिको प्राविधिक क्षमता विकास हुनुपर्ने अपेक्षा गरिएकामा किसानको आवश्यकतानुसार समयमै कृषि प्राविधिक पाउन नसकिरहेको मन्त्री अधिकारीले बताए । कृषि क्षेत्रमा बजेट धेरै देखिए पनि अनुदान र मल खरिदमा खर्च हुने गरेकाले कृषिको समग्र विकासका लागि कृषि क्षेत्रमा थप बजेट आवश्यक रहेकामा पनि मन्त्री अधिकारीले जोड दिए ।

विसं २०७२ देखि लागू भएको कृषि विकास रणनीति हाल परिमार्जनको चरणमा छ । रणनीति परिमार्जनका लागि सातै प्रदेशमा सरोकारवालाबीच छलफल गरी सुझाव लिएको छ । पूर्वसचिव गणेशराज जोशीको संयोजकत्वमा रणनीति परिमार्जनका लागि विज्ञ समूहले कार्य गरेको छ ।