काठमाडौं । जेन–जी आन्दोलनका क्रममा ज्यान गुमाएका ५३ जनाका परिवारलाई सरकारले राहत उपलब्ध गराएको छ। प्रत्येक परिवारलाई १५ लाख रुपैयाँका दरले राहत वितरण गरिएको गृह मन्त्रालयले जनाएको छ।

मन्त्रालयका अनुसार राहत वितरणका लागि अर्थ मन्त्रालयले कुल ७ करोड ९५ लाख रुपैयाँ उपलब्ध गराएको हो। तर कारागारबाट भाग्ने प्रयासका क्रममा सुरक्षाकर्मीको गोलीबाट मारिएका कैदीबन्दी वा थुनुवा, साथै शवको पहिचान नखुलेका व्यक्तिहरूका परिवारलाई भने राहत उपलब्ध गराइएको छैन।

गृह मन्त्रालयको पत्रअनुसार, जेन–जी आन्दोलनमा मारिएका ५३ जनालाई ‘सहिद सरह’ राहत प्रदान गरिएको हो। तीमध्ये २३ भदौका प्रदर्शनमा प्रहरीको गोली लागी मृत्यु भएकाहरू र उपचारका क्रममा ज्यान गुमाएका, साथै २४ भदौमा फैलिएर हिंसात्मक बनेको प्रदर्शनमा मारिएका व्यक्तिहरूका परिवारहरू पनि समावेश छन्।

मन्त्रालयले थप जानकारी दिँदै पहिचान नखुलेका अन्य मृतकमध्ये कसैको मृत्यु आन्दोलनकै क्रममा भएको पुष्टि भएमा त्यसबेला उचित निर्णय गरिनेछ।