काठमाडौं । सुदूरपश्चिम प्रदेशका मुख्यमन्त्री खगराज भट्टले प्रदेश सभाबाट विश्वासको मत लिन प्रक्रिया अघि बढाएका छन्। उनले बुधबार प्रदेश सभामा विश्वासको मतका लागि प्रस्ताव प्रस्तुत गर्ने भएका हुन्।

नेकपा संसदीय दलका नेता भट्ट २९ साउनमा नेकपा एमालेको समर्थनमा सुदूरपश्चिम प्रदेशको मुख्यमन्त्री नियुक्त भएका थिए। मुख्यमन्त्री बनेपछि संवैधानिक व्यवस्थाअनुसार प्रदेशसभाबाट विश्वासको मत लिनुपर्ने भएकाले उनले त्यससम्बन्धी प्रक्रिया अघि बढाएका हुन्। विश्वासको मत लिने विषयमा निर्णय गर्न भट्टले मंगलबार नेकपा संसदीय दलको बैठक बोलाएका थिए। बैठकबाट बुधबार प्रदेशसभामा विश्वासको मत लिने निर्णय गरिएको हो।

यसका लागि मुख्यमन्त्री भट्टले मंगलबार नै प्रदेश सभा सचिवालयलाई पत्र पठाउँदै आवश्यक बैठक आह्वान गर्न आग्रह गरेका थिए। उनको पत्रका आधारमा बुधबार दिउँसो १ बजे प्रदेशसभा बैठक बस्ने गरी कार्यतालिका तय गरिएको छ।