डोटी । काउली उत्पादन गरेर डोटीका किसानले पर्याप्त आम्दानी गरिरहेका छन् । विगतमा परम्परागत रूपमा तरकारी खेती गर्दै आएका किसान पछिल्लो समयमा आधुनिक रूपमा काउली खेतीतर्फ आकर्षित भएका हुन् ।

जिल्लाको केआईसिंह गाउँपालिका–४ का किसान शिवराज धामीले दुई रोपनी क्षेत्रफलमा काउली उत्पादन गर्दै आएका छन् । उनले काउली उत्पादनबाट गएको वर्ष दुई लाख ५० हजार रुपैयाँ आम्दानी गरेको बताउँदै यस वर्ष पनि झन्डै चार लाख रुपैयाँ बराबरको काउली बेच्न तयार भएको सुनाए ।

गोठेमलको प्रयोग गर्दै विषादीयुक्त काउली उत्पादन गर्दै आएको र व्यापारी घरमै आएर काउली खरिद गर्दै आएका किसान धामी बताउछन् । काउली उत्पादनले घरखर्च चलाउन विदेश जान नपरेको उनको भनाइ छ । केआईसिंह गाउँपालिका–४ का अर्का किसान डिलबहादुुर बुढामगरले दुई रोपनी जमिनमा काउली लगाएका छन् । काउली बेच्न तयार भइसकेको छ । गएको वर्ष एक रोपनीमा लगाएको काउलीबाट झन्डै एक लाख रुपैयाँ आम्दानी गरेको भन्दै उनले यस वर्ष पनि झन्डै दुई लाख रुपैयाँ बराबरको काउली तयार भएको बताए ।

परम्परागत खेतीको तुलनामा आधुनिक खेतीबाट पर्याप्त आम्दानी गर्न सकिने भएका कारण किसानहरूले व्यावसायिक रूपमा तरकारी खेती गर्न थालेका केआईसिहं गाउँपालिकाका अध्यक्ष लोकेन्द्रबहादुुर शाहीले जानकारी दिए । पालिकाले किसानले उत्पादन गरेका तरकारी बिक्री गर्न सहयोग गर्न थालेको उनले बताए । कृषि ज्ञान केन्द्र डोटीका प्रमुख गङ्गादत्त अवस्थीले सायल गाउँपालिका, दिपायल सिलगढी नगरपालिका, जोरायल गाउँपालिका र केआईसिहं गाउँपालिकालाई काउली पकेटको रूपमा छनोट गरी काउली उत्पादनमा जोड दिइएको बताए ।