काठमाडौं । सोमबार सेयर बजार परिसूचक करिब २० अंकले बढेको छ । अघिल्लो दिन घटेको बजार आज १९ दशमलव ९७ अंकले बढेको हो । आजको सेयर कारोबार बन्द हुँदा परिसूचक २७५८ दशमलव ०४ विन्दुमा पुगेको छ । त्यस्तै आज ‘क’ वर्गका कम्पनीको मापक सेन्सेटिभ इन्डेक्स भने १ दशमलव ५० अंकले घटेर ४७१ दशमलव ७९ विन्दुमा पुगेको छ । त्यस्तै आजको कारोबार बन्द हुँदा १३ उपसूचकमध्ये ४ वटाको सेयर मूल्य घटेको छ भने ९ वटाको बढेको छ ।

आज सेयर बजारमा कारोबार भएका कम्पनीमध्ये १२६ वटाको सेयर मूल्य बढेको छ भने ११२ कम्पनीको सेयर मूल्य घटेको छ । त्यस्तै ६ कम्पनीको सेयर मूल्य भने स्थिर रहेको छ ।

परिसूचकसँगै आज कारोबार रकममा पनि सुधार देखिएको छ । अघिल्लो दिन ८ अर्ब भन्दा माथिको कारोबार भएको बजारमा आज साढे १० अर्ब माथिको कारोबार भएको छ । आज सेयेर बजारमा ३१४ कम्पनीका २ करोड ३० लाख ११ हजार ३६१ कित्ता सेयर १ लाख ३ हजार ४८१ पटक खरिद बिक्री हुँदा १० अर्ब ५२ करोड १७ लाख ४६ हजार ५६४ रुपैयाँ बराबरको कारोबार भएको छ । त्यस्तै आज सेयर बजारमा कारोबार भएका कम्पनीमध्ये ४ कम्पनीको सेयर मूल्यमा सकारात्मक सर्किट लागेको छ ।