स्याङ्जा । जिल्लाको चापाकोट नगरपालिकाले छ सय विपन्न परिवारको निःशुल्क स्वास्थ्य बीमा गरेको छ । नगरपालिकाका १० वटा वडामध्ये प्रत्येक वडाका अति विपन्न ६० घर परिवारका दरले छनोट गरी नगरपालिकाले निःशुल्क स्वास्थ्य बीमा गरिदिएको हो ।

आर्थिक अभावकै कारण आधारभूत स्वास्थ्य सुविधा पाउनबाट बञ्चित नहोउन् भन्ने उद्देश्यले स्वास्थ्य बिमा गरिदिएको नगर प्रमुख देवबहादुर खाँडले बताए । ‘नेपाल सरकारले लागू गरेको स्वास्थ्य बिमा अभियानमा आवद्ध बनाइ स्वास्थ्य सेवालाई अति विपन्न वर्गको पहुँचसम्म पु–याउन निःशुल्क स्वास्थ्य बिमा गरिदिएका हौँ,’ उनले भने । नगरपालिकाले चालु आर्थिक वर्षमा अति विपन्न समुदायको स्वास्थ्य बीमा गर्न २५ लाख ६० हजार रुपैयाँ बजेट विनियोजन गरेको थियो । विनियोजित बजेटबाट पहिलो चरणमा ६०० परिवारको बीमा गरिएको र दोस्रो चरणमा अपाङ्गता भएका र अन्य विपन्न गरी १२५ जनाको बीमा गरिदिने नगरपालिकाले जनाएको छ ।

चालु आर्थिक वर्षमा ७२५ जनाको स्वास्थ्य बीमा गर्न बजेट विनियोजन गरेकामा आगामी आर्थिक वर्ष २०८२/०८३ का लागि थप बजेट व्यवस्थानको तयारी गरिरहेको नगरपालिकाले जनाएको छ । नगरपालिकाले स्वास्थ्य बीमा बनाइदिएका नागरिकलाई बीमा कार्ड वितरण गरेको छ । स्वास्थ्य बीमा कार्ड बनाइदिएसँगै पाँच जनाको परिवारलाई १ लाख रुपैयाँसम्मको  स्वास्थ्य उपचार सेवा निःशुल्क प्राप्त हुनेछ ।