काठमाडौं । नेपाल चेम्बर अफ कमर्सले हालै देशभर भएका आन्दोलनका क्रममा जनधनमा पुगेको ठूलो क्षतिप्रति गहिरो दुःख व्यक्त गर्दै शोकाकुल परिवारप्रति समवेदना प्रकट गरेको छ। आन्दोलनमा ज्यान गुमाएका नागरिकलाई श्रद्धाञ्जली अर्पण गर्दै चेम्बरले घाइतेहरूको शीघ्र स्वास्थ्यलाभको कामना पनि गरेको छ ।

चेम्बरले आन्दोलनका कारण औद्योगिक र व्यवसायिक क्षेत्रमा देखिएको गम्भीर असरप्रति चिन्ता व्यक्त गर्दै यसले देशको लगानीमैत्री वातावरणमा प्रतिकूल प्रभाव पारेको टिप्पणी गरेको छ। यस्तो परिस्थितिबाट मुलुकलाई जोगाउन सबै सरोकारवाला पक्ष संयमित रहनुपर्ने चेम्बरको भनाइ छ।

संगठनले जेन–जि पुस्ताले उठाएका भ्रष्टाचार नियन्त्रण, सुशासन, पारदर्शिता, रोजगारी सिर्जना र सरकारी सेवामा सहज पहुँच जस्ता विषयहरू आजको मुलुकका लागि अत्यन्तै जरुरी मुद्दा भएको भन्दै यसलाई सम्बोधन गर्न राज्य संयन्त्रले गम्भीर पहल गर्नुपर्नेमा जोड दिएको छ।

यस्ता घटना दोहोरिन नदिन संवाद र रचनात्मक सहकार्य अपरिहार्य रहेको चेम्बरले स्पष्ट पारेको छ। मुलुकको समग्र विकासका लागि सबै पक्षको सक्रिय सहभागिता आवश्यक भएको बताउँदै संगठनले दीर्घकालीन समाधान खोज्न सरकार, सरोकारवाला निकाय र आन्दोलनरत युवालाई एकैसाथ अघि बढ्न आह्वान गरेको छ।