काठमाडौं । जाजरकोट भूकम्पबाट क्षतिग्रस्त निजी आवासको क्षति आकलन गर्न राष्ट्रिय विपद् जोखिम न्यूनीकरण तथा व्यवस्थापन प्राधिकरण र मध्यपश्चिम विश्वविद्यालयबीच सम्झौता भएको छ ।

प्राधिकरणका कार्यकारी प्रमुख दिनेश भट्ट र विश्वविद्यालयको ग्राजुएट स्कुल अफ इञ्जिनियरिङका डिन सहप्राध्यापक डा राजन सुवालले आज यससम्बन्धी सम्झौता पत्रमा हस्ताक्षर गरे ।

कर्णाली प्रदेशको राजधानी सुर्खेत वीरेन्द्रनगरमा अवस्थित विश्वविद्यालयले २८ हजार तीन सय ५७ परिवारको निजी घरको क्षति अनुमान गर्न ८५ जना प्राविधिक भूकम्प प्रभावित जिल्लामा खटाउने प्राधिकरणका कार्यकारी प्रमुख भट्टले जानकारी दिए । यही चैत ३० गते साँझसम्मको प्राधिकरणको प्रणालीमा प्रविष्ट तथ्याङ्कानुसार जाजरकोट भूकम्पबाट प्रभावित ३४ हजार ३५ निजी आवासको विस्तृत क्षतिको अन्दाज भइसकेको छ ।