काठमाडौं । मंगलबार सेयर बजार उच्च अंकले घटेर बन्द भएको छ । अघिल्लो दिन लगातार तीन वटा सकारात्मक सर्किट लागेर छोटो समयमा नै बन्द भएको सेयर बजार आज भने उच्च अंकले घटेर बन्द भएको हो ।

आज सेयर बजार परिसूचक ३२.०८ अंकले घटेर २८४३.३५ विन्दुमा पुगेको छ । यो अघिल्लो दिनको भन्दा १.११ प्रतिशतले कम हो । आज सेयर बजारमा १७८ कम्पनीको सेयर मूल्य घटेको छ भने ७८ कम्पनीको सेयर मूल्य बढेको छ । आज ५ कम्पनीको सेयर मूल्य भने स्थिर रहेको छ ।

त्यस्तै आज सेन्सेटिभ इन्डेक्स पनि ४.४० अंकले घटेर ४८९.६९ विन्दुमा पुगेको छ । आज १३ उपसूचकमध्ये १० वटाको सेयर मूल्य घटेको छ भने ३ वटाको मात्रै बढेको छ । परिसूचक घटेको दिन सेयर बजारमा उच्च कारोबार भएको छ । आज सेयर बजारमा २१ अर्ब माथिको कारोबार भएको छ । आज ३२९ कम्पनीका ५ करोड २७ लाख ११ हजार ३५३ कित्ता सेयर २ लाख ५ हजार ६११ पटक खरिद बिक्री हुँदा २१ अर्ब ५० करोड २० लाख ३१ हजार ३२० रुपैयाँको कारोबार भएको छ ।

आज सेयर बजारमा दुई कम्पनीको सेयर मूल्यमा सकारात्मक सर्किट लागेर कारोबार भएको छ ।