काठमाडौं । दोर्दी खोला जलविद्युत कम्पनी लिमिटेडले प्रस्ताव गरेको हकप्रद सेयर निष्काशन योजना संशोधन भएको छ । कम्पनीको वार्षिक साधारणसभाले स्वीकृत गरेको प्रस्तावभन्दा कम अनुपातमा विद्युत नियमन आयोग बाट पूर्वस्वीकृति प्राप्त भएको हो ।
कम्पनीले गत पौष २९ मा सम्पन्न साधारणसभाबाट हाल कायम चुक्ता पूँजी २ अर्ब १० करोड ८५ लाख २० हजार ८०० रुपैयाँको १ः०.५६६२१२७९ अनुपातमा हकप्रद सेयर निष्काशन गर्ने निर्णय गरेको थियो । सोही अनुसार पूर्वस्वीकृतिका लागि आयोगमा निवेदन दिइएको थियो ।
तर आयोगले वैशाख १५ गतेको पत्रमार्फत कम्पनीलाई चुक्ता पूँजीको १ः०.२८८ अनुपातमा मात्र हकप्रद सेयर निष्काशन गर्न स्वीकृति दिएको जनाएको छ । उक्त अनुपात अनुसार कम्पनीले ६० करोड ८२ लाख ५४ हजार ९९२ रुपैयाँ बराबरको हकप्रद सेयर निष्काशन गर्न पाउनेछ ।
कम्पनीले सोही स्वीकृत अनुपातअनुसार आगामी प्रक्रिया अघि बढाउने जनाएको छ । दोर्दी खोलाले वाणिज्य बैंकको ऋण चुक्ता गर्ने प्रयोजनार्थ हकप्रद शेयर निष्काशन गर्न लागेको हो ।
