काठमाडौं । बंगलादेशको संसद्ले मिर्जा फखरुल इस्लाम आलमगिरलाई राष्ट्रपति चुनेको छ । करिब ३५ वर्षपछि बंगलादेशको २३औँ राष्ट्रपतिको निर्वाचन प्रत्यक्ष मतदानमार्फत भएको हो ।

सत्तारुढ बीएनपीका तर्फबाट मनोनीत उमेदवार मिर्जा फखरुल २५५ मत प्राप्त गरी राष्ट्रपति निर्वाचित भएका हुन् । उनी सत्तासीन बंगलादेश नेसनलिस्ट पार्टीका नेता हुन् । उनी पूर्वप्रधानमन्त्री शेख हसिनाका मुख्य विरोधीहरूमध्ये एक हुन् । सन् २०२४ मा विद्यार्थी आन्दोलनपछि शेख हसिनालाई सत्ताबाट हटाइएको थियो ।

आलमगिरले कठिन परिस्थितिमा बीएनपीको नेतृत्व सम्हाल्न महत्त्वपूर्ण भूमिका खेलेका थिए । उनलाई पटक–पटक गिरफ्तार पनि गरिएको थियो । बंगलादेशमा राष्ट्रपतिको पद आलंकारिक छ । यद्यपि, प्रस्तावित सुधारअन्तर्गत देशका शीर्ष नेताहरूबीच सत्ताको सन्तुलन कायम राख्न राष्ट्रपतिको पदलाई थप अधिकारहरू दिन सकिने बताइएको छ ।