काठमाडौं । नेपाल क्रिकेट संघ (क्यान) ले आयोजना गर्न लागेको सिद्धार्थ बैंक नेपाल प्रिमियर लिग (एनपीएल) को टोली लुम्बिनी लायन्सको इन्स्योरेन्स पार्टनरको रुपमा नेपाल इन्स्योरेन्स नियुक्त भएको छ । बुधबार एक कार्यक्रमको आयोजना गरी लुम्बिनी लायन्सका अध्यक्ष ईश्वर जिसी र नेपाल इन्स्योरेन्सका नायब प्रमुख कार्यकारी अधिकृत इश्वर पोखरेलले उक्त सम्झौतापत्रमा हस्ताक्षर गरेका हुन् ।

नेपालको क्रिकेट क्षेत्रलाई प्रोत्साहन गर्न र खेलाडीहरुलाई आर्थिक र व्यवसायिक रुपमा अगाडी बढाउने उद्देश्यले लुम्बिनी लायन्सको इन्स्योरेन्स पार्टनरको रुपमा सम्झौता गरेको नेपाल इन्स्योरेन्सका नायब प्रमुख कार्यकारी अधिकृत इश्वर पोखरेलले बताए । सम्झौता अनुसार लुम्बिनी लायन्सका खेलाडीहरुले प्रयोग गर्ने टोपीमा नेपाल इन्स्योरेन्सको आधिकारिक लोगो रहनेछ । नेपाली बीमा क्षेत्रलाई खेलकुदमा समेत जोडर अघि बढ्न नेपाल इन्स्योरेन्स सक्रिय देखिएको छ ।

नेपाल प्रिमियर लिग (एनपीएल) क्रिकेट प्रतियोगिता मंसिर १५ गतेदेखि पुष ६ गतेसम्म काठमाडौंको कीर्तिपुरस्थित टीयू क्रिकेट मैदानमा सुरू हुँदै छ । ८ टोलीको सहभागिता रहने प्रतियोगितामा लुम्बिनी प्रदेशको प्रतिनिधित्व लुम्बिनी लायन्सले गर्दैछ । यस टिमको मार्की खेलाडीका रुपमा नेपाली राष्ट्रिय टोलीका कप्तान रोहित पौडेल छन् । उनीसँगै राष्ट्रिय टोलीका विस्फोटक ब्याटर सन्दीप जोरा तथा राष्ट्रिय टोलीबाट खेलिसकेका विवेक यादव, अर्जुन साउद र सूर्य तामाङ पनि टोलीमा छन् ।

टिमको प्रशिक्षकमा नेपाली राष्ट्रिय टोलीका कन्सल्टेन्ट प्रशिक्षक रहेका नन्दन फाड्निस छन् भने कन्सलटेन्ट प्रशिक्षकमा राष्ट्रिय टोलीका पूर्व स्टार खेलाडी शक्ति गौचन छन् । शक्ति हाल नेपाली यू–१९ टिमको प्रशिक्षक समेत हुन् । टोलीले आफ्नो ब्राण्ड एम्बेस्डरको रुपमा नेपाली सिनेमा जगतका महानायक राजेश हमाललाई समेत नियुक्त गरिसकेको छ ।