काठमाडौं । मोदी इनर्जी लिमिटेडको विभिन्न समूहका सेयरधनीहरूको सेयरमा लगाइएको ‘लक–इन’ अवधि आगामी वैशाख ३० गते समाप्त हुने भएको छ । नेपाल धितोपत्र बोर्डको निर्देशनअनुसार कम्पनीमा दर्ता भएका कुल २ करोड ९० लाख कित्ता सेयरमध्ये केही समूहका सेयर निश्चित अवधिसम्म बेचबिखन गर्न नपाइने गरी ‘लक–इन’मा राखिएको थियो । अब सो अवधि पूरा हुन लागेको कम्पनीले जनाएको छ ।

लक–इनमा राखिएका सेयरमध्ये संस्थापक सेयरधनीहरूको २ करोड १७ लाख ५० हजार कित्ता, कर्मचारीहरूको ७६ हजार ७० कित्ता र आयोजना प्रभावित क्षेत्रका स्थानीय बासिन्दाहरूको ८ लाख ४ हजार ३९० कित्ता सेयर रहेका छन्। यसरी कुल २ करोड २६ लाख ३० हजार ४६० कित्ता सेयरको लक–इन अवधि सकिन लागेको हो ।

उक्त सेयरको लक–इन अवधि आउँदो वैशाख ३० गते समाप्त हुनेछ । सो मितिपछि सम्बन्धित सेयरधनीहरूले आफ्नो सेयर कारोबार गर्न सक्नेछन् । यद्यपि कम्पनीका सञ्चालक समितिका पदाधिकारी तथा उच्च व्यवस्थापन तहका कर्मचारीहरूको सेयर भने प्रचलित नियमअनुसार अझै रोक्का रहने कम्पनीले स्पष्ट पारेको छ ।