काठमाडौं । चार वटा कम्पनीले आईपीओ जारी गर्नका लागि नेपाल धितोपत्र बोर्डमा आवेदन दिएका छन् । बोर्डमा आईपीओ जारीको लागि स्वीकृति माग्दै आवेदन दिने कम्पनीमा मकरीगाड हाइड्रोपावर, कालिञ्चोक इन्भेष्टमेन्ट कम्पनी, इन्द्रेणी मसरुम फार्म र मध्यपुर अस्पताल लिमिटेडले रहेका छन् ।

यी कम्पनीले साउन महिनामा आईपीओको लागि आवेदन दिएका हुन् । यी चार कम्पनीहरुले अंकित मूल्य १०० रुपैयाँमा नै आईपीओ निष्कासन गर्ने गरी अनुमति माग गरेका हुन । अनुमति माग गरेका कम्पनीमध्ये मकरीगाड हाइड्रोपावर लिमिटेडले २२ लाख २७ हजार ५०० आईपीओ निष्कासनका लागि साउन २२ गते आवेदन दिएको हो । कम्पनीको बिक्री प्रबन्धक सानिमा क्यापिटल रहेको छ ।

त्यस्तै इन्द्रेणी मसरुम फार्म लिमिटेडले पनि साउन २२ गते आवेदन दिएको छ । यो कम्पनीले ८ लाख ७५ हजार कित्ता आईपीओ निष्कासन गर्ने जनाएको छ । यस कम्पनीको आईपीओको बिक्री प्रबन्धकमा मुक्तिनाथ क्यापिटल रहेको छ । मध्यपुर अस्पताल लिमिटेडले २८ लाख आईपीओ निष्कासन गर्न अनुमती माग गरेको छ । कम्पनीको आईपीओ बिक्री प्रबन्धकमा मुक्तिनाथ क्यापिटल रहेको छ ।

कालिन्चोक इन्भेष्टमेन्ट कम्पनीले २४ लाख कित्ता आईपीओ निष्कासन गर्न साउन २९ गते आवेदन दिएको हो । यस कम्पनीको आईपीओ बिक्री प्रबन्धकमा नबिल इन्भेष्टमेन्ट बैंकिङ रहेको छ ।