रूपन्देही । डिभिजन वन कार्यालय अर्घाखाँचीले जिल्लामा वन्यजन्तुको शिकार गर्न चाहने नेपाली नागरिकका लागि शिकार अनुमतिपत्र (लाइसेन्स) लिन सार्वजनिक सूचना जारी गरेको छ । लाइसेन्स प्राप्तसँगै रतुवा मृग,बँदेल,रातो मृग र चित्तल शिकार गर्न कानुनी रूपमा बाटो खुल्ने छ । वन्यजन्तुबाट भइरहेको बाली नोक्सानी तथा मानवीय क्षति कम गर्नको लागि कार्यालय यस्तो प्रक्रिया सुरू गरेको जनाएको छ ।

वन्यजन्तुबाट आक्रान्त बनेका कृषकलाई यो निर्णय कार्यन्वयनसँगै ठूलो राहत मिल्ने छ । डिभिजन वन कार्यालय प्रमुख नारायणदेव भट्टराईले राष्ट्रिय निकुञ्ज तथा वन्यजन्तु संरक्षण ऐन, २०२९, राष्ट्रिय निकुञ्ज तथा वन्यजन्तु संरक्षण नियमावली, २०३० तथा प्रचलित कानुनबमोजिम तोकिएको हतियार प्रयोग गरी रतुवा मृग, बँदेल, रातो मृग र चितलको शिकार गर्न अनुमतिपत्र लिन सकिने गरी सूचना जारी गरिएको बताए ।

शिकार अनुमतिपत्र लिन इच्छुक नेपाली नागरिकले राष्ट्रिय निकुञ्ज तथा वन्यजन्तु संरक्षण नियमावली, २०३० को नियम ९९१० को अनुसूची–१ बमोजिमको दस्तुर तिरी २०८३ साल भदौ १० गतेभित्र डिभिजन वन कार्यालय अर्घाखाँचीमा निवेदन पेश गर्नुपर्ने कार्यालयले जनाएको छ ।

कार्यालयका सूचना अधिकारी केसर खड्काले निवेदनका साथ नेपाली नागरिकताको प्रमाणपत्रको प्रतिलिपि, लाइसेन्स प्राप्त हतियारको प्रमाणपत्र तथा प्रचलित कानुनले तोकेका अन्य आवश्यक कागज पेश गर्नुपर्ने जानाकारी दिए । वन कार्यालयले तोकिएको कानुनी प्रक्रिया पूरा गरेर मात्र शिकार गर्न तथा अनुमतिपत्रबिना वन्यजन्तुको शिकार नगर्नसमेत आग्रह गरेको छ।