काठमाडौं । सालपा विकास बैंक लिमिटेडको आईपीओमा आजदेखि आवेदन खुला भएको छ । बैंकले आज मंसिर २५ गतेदेखि पहिलो चरणमा वैदेशिक रोजगारीमा रहेका नेपालीहरूका लागि आईपीओ निष्कासन गरेको हो ।

बैंकले प्रतिकित्ता १०० रुपैयाँका दरले कुल १७ लाख २३ हजार ८८० कित्ता आईपीओ निष्कासन गर्न मंसिर ८ गते नेपाल धितोपत्र बोर्डबाट अनुमति पाएको थियो । जसमध्ये बैंकले प्रथम चरणमा १ लाख ७२ हजार ३८८ कित्ता आईपीओ नेपाल सरकारबाट श्रम स्वीकृति लिई वैदेशिक रोजगारीमा गएका नेपालीहरूका लागि निष्कासन गरेको हो । यसमा मंसिर २५ गतेदेखि २९ गतेसम्म आवेदन दिन सकिनेछ । आवेदन दिंदा कम्तीमा १० कित्ता र बढीमा २५ हजार कित्तासम्म माग गर्न सकिनेछ । त्यसैगरी बैंकले ८६ हजार १९४ कित्ता आईपीओ सामूहिक लगानी कोषलाई र २६ हजार ११९ कित्ता आईपीओ कम्पनीमा कार्यरत कर्मचारीहरूका लागि सुरक्षित गरी बाँकी रहेको १४ लाख ३९ हजार १७९ कित्ता आईपीओ दोस्रो चरणमा सर्वसाधारणका लागि निष्कासन गर्नेछ ।

वैदेशिक रोजगारीमा रहेका नेपालीहरूले नेपाल धितोपत्र बोर्डबाट अनुमति लिई आस्बा सेवामा सहभागी सबै बैंक तथा वित्तीय संस्था र तिनका तोकिएका शाखा कार्यालयका साथै सिडिएस एण्ड क्लियरिङ्ग लिमिटेडद्वारा निर्मित ‘मेरो सेयर’ अनलाइन प्रयोग गरी सजिलै आवेदन दिन सक्नेछन् । यसमा धितोपत्र निष्काशन तथा बिक्री प्रबन्धकमा मुक्तिनाथ क्यापिटल लिमिटेड रहेको छ ।