काठमाडौं । चालु आर्थिक वर्षको पुस मसान्तमा धेरै वटा कम्पनीले आफ्नो वार्षिक साधारण सभा सम्पन्न गरेका छन् । सोही अवसरमा यता शिवम् सिमेन्ट्स लिमिटेडले पनि आफ्नो नवौं वार्षिक साधारण सभा सम्पन्न गरेको जनाएको छ। राष्ट्रिय सभा गृह, प्रदर्शनीमार्ग, काठमाडौंमा आयोजित सभाले आर्थिक वर्ष २०८०/०८१ का लागि संचालक समितिले प्रस्ताव गरेका विभिन्न सामान्य तथा विशेष प्रस्तावहरू पारित गरेको कम्पनीले जनाएको हो।

सोही सभामा कम्पनीका अध्यक्ष गौरव गोयलले अध्यक्षता गरेका थिए। सभाले आव २०७९/०८० का लागि कम्पनीको प्रगति प्रतिवेदन, लेखापरीक्षकको प्रतिवेदनसहितका आर्थिक विवरणहरू पारित गरेको छ। त्यस्तै, आगामी आ।व। २०८१/०८२ का लागि लेखापरीक्षक नियुक्त गर्ने र निजको पारिश्रमिक निर्धारण गर्ने प्रस्ताव पनि पारित भएको जनाइएको छ।

त्यसरी नै सभाले कम्पनीको चुक्ता पुँजी ५ अर्ब २ करोड ७० लाखको ८.५५ प्रतिशत बोनस सेयर र ०.४५ प्रतिशत नगद लाभांश वितरण गर्ने प्रस्ताव पनि अनुमोदन गरेको छ। बोनस सेयर वितरणपछि कम्पनीको चुक्ता पूँजी ५ अर्ब ४५ करोड ६८ लाख ८ हजार ५ सय पुग्ने कम्पनीले जनाएको हो।