काठमाडौं । जापानको राजनीतिक इतिहासमा पहिलोपटक महिला प्रधानमन्त्रीको रूपमा साने ताकाइची पदासीन भएकी छन्। अक्टोबर २१ मा संसदबाट निर्वाचित भएपछि उनले कार्यभार सम्हाल्दै देश पुनर्निर्माण र सत्तारूढ दल लिबरल डेमोक्रेटिक पार्टी (LDP) लाई पुनः सशक्त बनाउन निरन्तर परिश्रम गर्नुपर्ने बताइन् ।

प्रधानमन्त्री बनेकी ताकाइचीले पदग्रहण भाषणमा परम्परागत वर्क–लाइफ ब्यालेन्सको अवधारणालाई अस्वीकार गर्दै ‘कडा परिश्रम’लाई मात्र देश पुनर्जागरणको उपायका रूपमा चित्रित गरिन्।“हामी अहिले अलि कम जनशक्ति भएका छौं, त्यसैले म सबैलाई अनुरोध गर्छु— काम गर्नुहोस्, घोडाजस्तै काम गर्नुहोस्। म आफैं पनि वर्क–लाइफ ब्यालेन्सको सोच त्याग्नेछु। म काम गर्छु, फेरि काम गर्छु, अनि फेरि पनि काम गर्छु,” उनले भनेको उद्धृत गर्दै समाचार संस्था ANI ले लेखेको छ।

‘देश र दल दुबै पुनः निर्माण गर्नुछ’

ताकाइचीले आफ्नो सम्बोधनमा जापान र LDP दुबैलाई पुनः सुदृढ बनाउन सबै पुस्ताको सहभागिता आवश्यक रहेको बताइन्। उनले भनिन्, “देश पुनर्निर्माण गर्न र LDP लाई पुनःजीवन दिन हरेकले आफ्नो क्षेत्रमा समर्पणसाथ काम गर्नुपर्छ। म विनम्रतापूर्वक काम गर्नेछु र सबैको मार्गदर्शन चाहन्छु।”

उनले थपिन्, “यो क्षणमा खुशीभन्दा पनि जिम्मेवारी र कठिनाइ बढी महसुस भइरहेको छ। धेरै नीति र योजना तत्काल कार्यान्वयन गर्नुपर्ने छ। हामीले LDP लाई थप ऊर्जावान र सकारात्मक बनाउनेछौं।”

अल्पमत सरकारको चुनौती

६४ वर्षीया ताकाइची जापानकी पहिलो महिला प्रधानमन्त्री बनेकी हुन्। लिबरल डेमोक्रेटिक पार्टीकी अध्यक्षको रूपमा अक्टोबर ४ मा निर्वाचित भएपछि उनी संसदको तल्लो सदनमा २३७ मत प्राप्त गर्दै प्रधानमन्त्रीमा चयन भइन्। उनका प्रतिस्पर्धी, संविधानिक डेमोक्रेटिक पार्टीका नेता योशिहिको नोदाले १४९ मत पाएका थिए।

तर, ताकाइची प्रधानमन्त्री बनेलगत्तै गठबन्धनको पुरानो साझेदार कोमेइतो पार्टीले उनको ‘रूढिवादी विचार’ र LDP को ‘स्लश फन्ड घोटाला’को कारण गठबन्धन तोडेको थियो। त्यसपछि ताकाइचीले जापान इन्नोभेशन पार्टी (JIP) सँग सहकार्य गरेर नयाँ गठबन्धन सरकार बनाएकी हुन्।

यो नयाँ गठबन्धनसँग संसदको तल्लो सदनमा २३१ सिट छन्, जसले बहुमतको सिमाना भन्दा दुई सिट कम छ। तर यो संख्या ताकाइचीलाई प्रधानमन्त्री बन्न पर्याप्त भएको जापानी संचारमाध्यमहरूले जनाएका छन्।

ताकाइचीको सन्देश स्पष्ट छ— जापानको भविष्य पुनर्निर्माण मेहनत र समर्पणमा निर्भर हुनेछ। उनी आफूलाई ‘वर्क–लाइफ ब्यालेन्स’ भन्दा ‘वर्क–फर्स्ट’ नेताको रूपमा स्थापित गर्न चाहन्छिन्।