काठमाडौं — विगत केही समयदेखि विभिन्न सञ्चारमाध्यम र सामाजिक सञ्जालमा बौद्ध गुम्बा तथा बौद्ध समुदायबारे अनर्गल र तथ्यहीन सामग्रीहरू प्रसारित भएको भन्दै नेपाल शेर्पा संघ र समग्र शेर्पा समुदायले ती गतिविधिप्रति कडा आपत्ति जनाएको छ ।
धार्मिक र सम्प्रदायिक सद्भावमा आँच पु¥याउने, आपसी भाइचारा र सामाजिक एकतालाई कमजोर बनाउने यस्ता गलत प्रचार–प्रसारले देशको शान्ति र सहिष्णुतामा गम्भीर असर पार्ने नेपाल शेर्पा संघमार्फत शुक्रवार विज्ञप्ति जारी गर्दै अध्यक्ष लाक्पा ठिन्ले शेर्पाले आपत्ति जनाएका छन् ।
संघले यस्ता भ्रम फैलाउने, द्वन्द्व भडकाउने र समाजलाई विभाजनतर्फ उन्मुख गराउने अभिव्यक्ति तथा गतिविधिलाई तत्काल नियन्त्रण गर्न र दोषीलाई कानूनी दायरामा ल्याउन राज्यका सम्बन्धित निकायसँग माग गरेको छ ।
बुद्धले फैलाएको ज्ञान र पञ्चशिलका सिद्धान्तअनुसार सञ्चालन भइरहेका पवित्र बौद्धधाम, गुम्बा र चैत्यहरू शान्ति, अध्ययन र अभ्यासका स्थल हुन्, त्यहाँ विभिन्न वस्तुहरू लुकाउने वा गैरधार्मिक क्रियाकलाप हुने कल्पना असम्भव रहेको विज्ञप्तिमा उल्लेख गरिएको छ ।
केही अराजक तत्वले गलत मानसिकताका साथ बौद्ध धर्म र विश्वभरका बौद्ध अनुयायीहरूको भावनामा चोट पु¥याउने गरी भ्रम फैलाएको बताउँदै त्यसप्रकारका दुराशयपूर्ण प्रचारलाई शेर्पा संघले अस्वीकार गरेको छ ।
त्यस्तै, जिम्मेवार राजनीतिक दलका सदस्य र आफूलाई प्रबुद्ध वर्ग ठान्ने व्यक्तिहरूले समेत यसप्रकारका आधारहीन प्रचारमा संलग्न भएकोप्रति दुःख व्यक्त गर्दै संघले यी गतिविधिहरू केवल एउटा धार्मिक समुदायमाथिको आक्रमण मात्र होइन, राष्ट्रकै एकता र हितविरुद्ध परिचालित योजनाको हिस्सा रहेको जनाएको छ ।
शेर्पा संघले सञ्चारमाध्यमहरूलाई पनि सत्य, तथ्य र पुष्टि भएको जानकारी मात्र सम्प्रेषण गर्न आग्रह गरेको छ । प्रमाणसहित देखाउन सकिँदैन भने ती असत्य प्रचार फिर्ता सचउन पनि संघले चेतावनी दिएको छ ।
राज्यका निकायलाई छानबिन गरी यथार्थ सार्वजनिक गर्न अनुरोध गर्दै सस्तो लोकप्रियता र व्यक्तिगत लाभका लागि धार्मिक भावनामा चोट पु¥याउने क्रियाकलाप विरुद्ध आवश्यक कानूनी कदम चाल्न शेर्पा समुदाय जुनसुकै मूल्य चुकाउन तयार रहेको शेर्पा संघको चेतावनी छ ।