काठमाडौँ । १६ औँ नेपाल ञिङमा मोन्लाम कार्यक्रम आजदेखि शुरु भएको छ । ञिङ्मा मोन्लाम नेपाल बौद्ध ञिङमा संघको आयोजनामा भएको हो । १६ औँ नेपाल ञिङमा मोन्लाम कार्यक्रम विश्वविख्यात बौद्ध तीर्थस्थल बौद्ध चैत्य नजिकैको शेर्पा सेवा केन्द्र (शेर्पा गोन्पा) मा शुरु भएको हो ।
नेपाल बौद्ध ञिङमा संघले यो कार्यक्रम २०६६ सालदेखि वार्षिक रूपमा आयोजना गर्दै आएको छ । कार्यक्रममा परम श्रद्धेय टुल्कु रिग्जीन पेमा रिन्पोछे, परम श्रद्धेय खेन्पो साङ्ग्या राङज्यूङ रिन्पोछे, श्रद्धेय टुल्कु ङवाङ थरछिन रिन्पोछे, र श्रद्धेय टुल्कु ङवाङ लाप्सुम रिन्पोछेज्युको सहभागिता रहेको छ । यसै गरी देशभरका गोन्पाबाट रिन्पोछे, टुल्कु, खेन्पो, लामा र लोपेनहरूको पनि सहभागिता कार्यक्रममा रहेको छ ।
मोन्लम पूजास्थललाई रङ्गीचङ्गी तोर्मा र निर्मल जलले आकर्षक तरिकाले भव्य सजाइएको छ । बौद्ध उपासक र उपासिकाहरूको उल्लेखनीय उपस्थितिमा आयोजित मोन्लाम कार्यक्रम विश्व शान्तिको कामनासहित आयोजना गरिएको हो । मोन्लाम कार्यक्रममा रोग, युद्ध, द्वन्द्व र प्राकृतिक प्रकोपबाट देश र समाजको मुक्तिको प्रार्थना गर्दै दिगो शान्ति, सुख र समृद्धिको कामना गरिने आयोजकको भनाइ छ ।
आयोजक सस्थाका अध्यक्ष आचार्य नुर्बुका अनुसार पुस १४ देखि १९ गतेसम्म ६ दिन सञ्चालन हुने मोन्लाम प्रत्येक दिन विहान ७ः३० बजेदेखि अपराह्न ४ बजेसम्म सञ्चालन हुनेछ । महायान बौद्ध परम्परा अनुसार पाठपूजा गरिने मोन्लम कार्यक्रममा शरण गमन र बोधिचित्त उत्पादको पाठ गरिन्छ । यसै गरी प्रज्ञापारमिता हृदय सूत्र पाठ, आचार्य पद्मसम्भवका सप्त परिच्छेद वाचन, भद्रचर्या प्रणिधान राजा पाठ, मञ्जुश्री नाम सङ्गीति र तारा स्तुति पाठ सहित मंगल परिणामना पनि गरिन्छ ।
मोंलामको सामूहिक प्रार्थनामा भिक्षु, श्रामणेर, श्रामणेरिका, उपासक र उपासिकाहरू सहभागी भई लयबद्ध रूपमा मोन्लाम मन्त्र उच्चारण गर्दै समस्त प्राणीहरूको हित र कल्याणको कामना गर्नेछन् ।
श्रद्धालुहरूलाई रिन्पोचेज्यु तथा लामाहरूको दर्शन गर्ने व्यवस्था मिलाइएको छ । सामूहिक पाठ सुनेर आत्मिक शान्ति र सकारात्मक ऊर्जा प्राप्त भएको श्रद्धालुहरुको भनाइ छ । विभिन्न जिल्लाका गोन्पाबाट भिक्षु र श्रद्धालुहरू हजारौंको संख्यामा कार्यक्रममा सहभागी भएका छन् । मोन्लाम कार्यक्रमले धार्मिक, सांस्कृतिक र पर्यटन प्रवद्र्धनमा योगदान पु¥याउने विश्वास गरिएको छ ।
तस्वीर सौजन्यः आचार्य सार्की शेर्पा