शेर्माथाङ्ग- ‘शेर्माथाङ’ सिन्धुपाल्चोक जिल्लाको हेलम्बु क्षेत्रमा अवस्थित एक सुन्दर र शान्त गाउँ हो । यहाँको उचाइ करिब २ हजार ६ सय मिटर वरिपरि रहेको छ । जहाँको प्राकृतिक सौन्दर्यता, धार्मिक तथा सांस्कृतिक सम्पदा र शान्त वातावरणले पर्यटकहरू मोहित बनाउँछ । प्राकृतिक सौन्दर्यता, योल्मो समुदायको संस्कार र परम्पराको अवलोकन र अध्यन गर्ने पर्यटकहरूको लागि ‘शेर्माथाङ’ अनमोल गन्तव्य बनेको छ ।

‘शेर्माथाङ’ वरपर रहेका हरियाली डाँडाहरू, जंगलहरू र खेतहरूले गाउँलाई मनमोहक बनाएको छ । लाङटाङ हिमश्रृङ्खलाको उच्च शिखरबाट झर्ने नदीहरूले गाउँलाई अनुपम बनाएका छन् । वसन्त ऋतुमा ढकमक्क फुल्ने लालीगुराँस, चिमाल र असंख्या फूलहरूले वातावरणलाई रङ्गीन र आकर्षक बनाउँछ । यस क्षेत्रको प्रकृतिको अवस्था समग्रमा समृद्ध जैविक विविधतायूक्त पाइन्छ । त्यस्तैले यस क्षेत्रमा यात्रा गर्दा पर्यटकहरूलाई आनन्दमय अनुभूत हुन्छ । पदयात्रामा जानेहरूले विभिन्न वन्यजन्तु र दुर्लभ चराचुरुङ्गीका प्रजातिहरू देख्न सक्छन् ।

‘शेर्माथाङ’ हेलम्बु पदमार्गको मुख्य क्षेत्र नै हो । यहाँबाट विभिन्न पदमार्गहरूको शुरुवात हुन्छ । ‘शेर्माथाङ’ हिमाल हरेरे आनन्द लिन चाहने तर अत्यधिक उचाइको जोखिम नचाहने यात्रुहरूको लागि उपयुक्त गन्तव्य हो । ‘शेर्माथाङ’को पदयात्रामा झरना, घना जंगल र प्राकृतिक सौन्दर्यसहितको रोमाञ्चक अनुभव लिन सकिन्छ ।
‘शेर्माथाङ’मा बसोबास गर्ने प्रमुख समुदाय योल्मो हो । जसलाई हेलम्बु शेर्पा पनि भनिन्छ । यो समुदायको सांस्कृतिक धरोहर, धार्मिक परम्परा, र जीवनशैली यस गाउँको मुख्य आकर्षण हो । ‘शेर्माथाङ’मा रहेका बौद्धस्तुपा, गुम्बाहरू र अन्य धार्मिक स्थलहरूले यहाँको धार्मिक आस्था झल्काउँछन् । आदिम कालदेखि यस क्षेत्रमा बसोवास गर्दै आएका योल्मो समुदायको आफ्नै खाले विशिष्ट भाषा, धर्म र संस्कार र संस्कृति जीवित राखेका कारणपनि गाउँको छुट्टै विशेषता छ ।

बौद्ध धर्मको प्रभाव रहेको यस पवित्र थलोको जीवनशैलीमा गहिरो रूपमा समाहित भएको पाइन्छ । ‘शेर्माथाङ’मा रहेका गुम्बाहरूमा हुने बौद्ध दर्शनसँग सम्वन्धित प्रार्थना, माने घुमाइने प्रार्थना पाङ्ग्राहरू, चौतरा, डाँडापाखेरी र घरघरमा देख्न सकिने लुङ्ता (बौद्ध झण्डा),तर्जो (ध्वजापताहरु) टाँगिएर शोभायमान वातावरण निर्माण गरेका छन् । गुम्बामा लामो समयदेखि साधनारत भिक्षुहरूको शान्त जीवनशैली र प्रार्थनाको ध्वनिले आध्यात्मिक रूपमा शान्त र शुद्ध महसुस गराउँछ ।

‘शेर्माथाङ’ मा योल्मो समुदायको मुख्य चाडपर्वको रुपमा लोसार (नयाँ वर्ष) विशेष रूपमा मनाइन्छ । जसमा परम्परागत नृत्य, सांगीतिक कार्यक्रम, र धार्मिक अनुष्ठानहरू आयोजना गर्ने प्रचलन रही आएको छ । परम्परागत भेषभूषा र आभूषणहरू पहिरि विभिन्न सामाजिक, धार्मिक कार्यक्रममा मानिसहरु सहभागि हुने प्रचलन विशेष खालको छ । जसले शेर्माथाङको सांस्कृतिक वैभवलाई झल्काउँछ ।
‘शेर्माथाङ’ गाउँलाई शान्ति र आध्यात्मिक भन्दा अतिशयूक्ति हुँदैन । सफा, स्वच्छ, शुद्ध र शान्त वातावरणले यहाँ घुम्न आउने जोकोहीलाई शारीरिक मात्र नभई मानसिक र आध्यात्मिक रूपले पनि ताजगी प्रदान गर्छ नै । ध्यान, योग अर्थात धार्मिक पर्यटनको खोजीमा आउनेहरूले यहाँको गुम्बाहरूमा प्रार्थना गरी मनमा शान्ति प्राप्त गर्न सक्छन् ।

‘शेर्माथाङ’ जस्तो अद्वितीय गन्तव्यमा पाइला टेक्न पाउनु आफैँमा अहोभाग्यको कुरा हो । प्राकृतिक सौन्दर्यता, सांस्कृतिक सम्पदा र अध्यात्मिकता एकसाथ अनुभूत गर्न सकिने यस पवित्र थलोको भ्रमण गरी जीवनलाई नयाँ शेराबाट शुरुवात गर्न सकिन्छ । दैनिक विभिन्न तनाव, दौडधूप र क्रान्तिमय जीवनलाई केही समय भएपनि अनान्दभूत गराउँदै मनमा शान्ति र मुहारमा कान्ति ल्याउन ‘शेर्माथाङ’ पुग्नै पर्छ ।