काठमाडौं । यो साता नेप्से परिसूचक करिब २ प्रतिशत घटेर बन्द भएको छ । गत साता २७३४ दशमलव ९३ विन्दुमा बन्द भएको नेप्से परिसूचक यो साता १.९२ प्रतिशत अर्थात ५२ दशमलव ६४ अंक घटेर २६८२ दशमलव २९ विन्दुमा पुगेको हो ।

यो साता ५ कारोबार दिनमध्ये चार कारोबार दिन नेप्से घटेको थियो भने एक कारोबार दिन नेप्से बढेको थियो । यस साताको बुधबार नेप्से करिब ४६ अंक बढेको थियो । यो साता सेन्सेटिभ इण्डेक्स ५ दशमलव ७९ अंक घटेको छ भने फ्लोट इण्डेक्स ३ दशमलव ६५ अंक र सेन्सेटिभ फ्लोट इण्डेक्स २ दशमलव ०७ अंक घटेको छ ।

नेप्सेसँगै यस साता कारोबार रकम पनि घटेको छ । गत साता दैनिक औषतमा ९ अर्ब ८ करोडको सेयर खरिदबिक्री भएको बजारमा यस साता दैनिक औषतमा ५ अर्ब ७४ करोडको सेयर किनबेच भएको छ । गत साताको तुलनामा यस साताको दैनिक औषत कारोबार रकम ३६.७८ प्रतिशत घटेको हो । यस साता दैनिक औषत सेयर संख्या ३५.३७ प्रतिशत घटेको छ भने दैनिक औषत कारोबार संख्या ३०.२१ प्रतिशत घटेको छ ।

यस साता नेप्सेको कुल बजार पुँजीकरण १.९२ प्रतिशत घटेको छ । गत साताको अन्तिम कारोबार दिन ४५ खर्ब ३६ अर्ब रुपैयाँ रहेको नेप्सेको कुल बजार पुँजीकरण, यस साता ८७ अर्ब रुपैयाँ घटेर ४४ खर्ब ४९ अर्बमा झरेको छ । यो सााता १३ उपसमूहमध्ये १ उपसमूहको परिसूचक बढेको छ भने १२ उपसमूहको परिसूचक घटेको छ । यस साता उत्पादन तथा प्रशोधन उपसमूहको परिसूचक २.०७ प्रतिशत बढेको छ । गत साता ६७२६ दशमलव ५८ विन्दुमा बन्द भएको यस उपसमूहको परिसूचक, यस साता १३८ दशमलव ९२ अंक बढेर ६८६ दशमलव ५० विन्दुमा पुगेको छ ।

यस साता जीवन बीमा उपसमूहको परिसूचक सर्वाधिक ५.९५ प्रतिशत घटेको छ । गत साता १३७५५ दशमलव ३५ विन्दुमा बन्द भएको यस उपसमूहको परिसूचक, यस साता ८१८ दशमलव ९३ अंक घटेर १२९३६ दशमलव ४२ विन्दुमा झरेको छ ।