उदयपुर । उदयपुरको रौतामाई गाउँपालिकाको ऐतिहासिक तथा धार्मिकस्थल रौतामा सञ्चालन गरिएको पाँच दिने प्रथम रौता पर्यटन महोत्सवमा तीन लाखले भ्रमण गरेका छन् । चैत २९ देखि वैशाख ३ गतेसम्म सञ्चालन गरिएको प्रथम रौता पर्यटन महोत्सवमा उदयपुरसहित कोशी, मधेस प्रदेशका अन्य जिल्लाबाट उल्लेख्य उपस्थित रहेको आयोजक रौता पर्यटन महोत्सव समितिका संयोजक दिनेश श्रेष्ठले बताए ।

रौता पर्यटन महोत्सवमा रु पाँच करोडभन्दा बढीको कारोबारसमेत भएको आयोजकले बताएको छ । कोशी प्रदेशका अन्य जिल्लाको महत्त्वपूर्ण पर्यटकीय गन्तव्यस्थलजस्तै उदयपुरको रौता पनि एक महत्त्वपूर्ण धार्मिक र मनोरम पर्यटन गन्तव्यस्थल भएका कारण धार्मिक पर्यटन प्रवर्द्धनका लागि यसपटक नयाँ वर्षको अवसर पारेर प्रथम रौता पर्यटन महोत्सवको आयोजना गरिएको हो ।

कोशी प्रदेश पर्यटन मन्त्रालय, उदयपुरको रौतामाई गाउँपालिका तथा त्रियुगा नगरपालिकाको सहयोगमा पर्यटन महोत्सव सञ्चालन गरिएको पर्यटन महोत्सवको उद्घाटन कोशी प्रदेशका पर्यटनमन्त्री भीमप्रसाद पराजुलीले गरेका थिए ।