काठमाडौं । आन्तरिक उडान सञ्चालन गर्दै आएका निजी वायुसेवा कम्पनीहरू अहिले सञ्चालन खर्चको चापले थिचिँदै गएका छन् । हवाई इन्धनको मूल्य लगातार बढ्दै गएपछि व्यवसाय नै धान्न कठिन हुँदै गएको उनीहरूको गुनासो हुन् ।

वायुसेवा सञ्चालक संघले बिहीबार संस्कृति, पर्यटन तथा नागरिक उड्डयनमन्त्री खड्कराज पौडेल (गनेस) लाई पत्र लेख्दै तत्काल सहुलियतका उपायहरू आवश्यक रहेको भन्दै ध्यानाकर्षण गराएको छ । संघले हालको परिस्थितिले वायुसेवा क्षेत्र गम्भीर संकटतर्फ धकेलिँदै गएको उल्लेख गरेको छ ।

संघका अध्यक्ष प्रदीप जंग पाण्डेका अनुसार कोभिड–१९ महामारीपछि क्रमशः पुनर्जीवित हुँदै गएको पर्यटन क्षेत्र फेरि विभिन्न बाह्य तथा आन्तरिक कारणले दबाबमा परेको छ । विशेषगरी गत २३ र २४ भदौमा भएको ‘जेनजी’ आन्दोलन र त्यसपछि मध्यपूर्वमा जारी द्वन्द्वका कारण अन्तर्राष्ट्रिय बजारमा समेत असर परेपछि हवाई इन्धनको मूल्य अस्वाभाविक रूपमा बढेको उनको भनाइ छ ।