काठमाडौं । सर्वोत्तम सिमेन्ट लिमिटेडको नाफामा सुधार देखिएको छ । कम्पनीले सार्वजनिक गरेको गत आर्थिक वर्ष २०८२/८३ को चौथो त्रैमासिकसम्मको अपरिष्कृत वित्तीय विवरण अनुसार अघिल्लो आवको भन्दा नाफामा सुधार देखिएको हो ।

कम्पनीले सार्वजनिक गरेको विवरण अनुसार समीक्षा अवधिमा कम्पनीको बिक्री आम्दानी, खुद नाफा र प्रतिसेयर आम्दानीमा सुधार देखिएको छ । समीक्षा अवधिमा कम्पनीको खुद नाफा १ अर्ब १० करोड रुपैयाँ पुगेको छ । जुन अघिल्लो आवको भन्दा ७.७० प्रतिशतले बढी हो । अघिल्लो आवको सोही अवधिमा कम्पनीको नाफा १ अर्ब २ करोड ८२ लाख रुपैयाँ रहेको थियो ।

समीक्षा अवधिमा कम्पनीको कुल नाफा पनि १५.६२ प्रतिशतले बढेर २ अर्ब ३२ करोड ३३ लाख रुपैयाँ पुगेको छ । अघिल्लो वर्षको यस्तो नाफा २ अर्ब रुपैयाँ रुपैयाँ रहेको थियो । समीक्षा अवधिमा कम्पनीको सञ्चालन आम्दानी ७.५६ प्रतिशतले बढेको छ । कम्पनीले गत आर्थिक वर्षको अन्तिमसम्ममा १० अर्ब २५ करोड ८५ लाख रुपैयाँ सञ्चालन आम्दानी गरेको छ । अघिल्लो आवको सोही अवधिसम्ममा यस्तो आम्दानी ९ अर्ब ५३ करोड ७३ लाख रुपैयाँ रहेको थियो ।

वित्तीय विवरण अनुसार कम्पनीको वित्तीय खर्च अघिल्लो वर्षको २९ करोड ६२ लाख रुपैयाँबाट घटेर २४ करोड २४ लाख रुपैयाँमा झरेको छ, जसले नाफा वृद्धिमा टेवा पुर्‍याएको छ । कम्पनीको चुक्ता पूँजी अघिल्लो वर्षको ४.९७ अर्बबाट बढेर ५ अर्ब २२ करोड ४२ लाख रुपैयाँ पुगेको छ ।

कम्पनीको जगेडा कोष ४ अर्ब ८७ करोड र पुनःमूल्याङ्कन कोष ३३ करोड ६८ लाख रुपैयाँ गरी कुल इक्विटी १० अर्ब ४३ करोड ८८ लाख रुपैयाँ पुगेको छ । कम्पनीको प्रतिसेयर आम्दानी २१ रुपैयाँ २० पैसा र प्रतिसेयर नेटवर्थ १९९ रुपैयाँ ८९ पैसा रहेको छ ।