काठमाडौं । गार्डियन माइक्रो लाइफ इन्स्योरेन्सको वैदेशिक रोजगारमा रहेका नेपालीका लागि जारी आईपीओ आज बाँडफाँट भएको छ । तोपत्र बिक्री प्रबन्धक कुमारी क्यापिटलको कार्यालयमा आइपीओ बाँडफाँट गरिएको हो ।

गार्डियन माइक्रो लाइफले पहिलो चरणमा वैदेशिक रोजगारमा रहेका नेपालीका लागि गत मंसिर १९ गतेदेखि पुस ३ गतेसम्म आइपीओ बिक्री खुला गरेको थियो । नेपाल धितोपत्र बोर्डबाट कम्पनीले चुक्तापुँजीको ३० प्रतिशतले हुन आउने २२ करोड ५० लाख रुपैयाँको आइपीओ ल्याउने अनुमति पाएको छ । आईपीओ बिक्रीपछि कम्पनीको चुक्तापुँजी ७५ करोड रुपैयाँ पुग्नेछ ।

पहिलो चरणमा कम्पनीले वैदेशिक रोजगारमा रहेका नेपालीलाई अनुमति पाएको २२ करोड ५० लाख रुपैयाँको १० प्रतिशतले हुन आउने २ करोड २५ लाख रुपैयाँको आइपीओ बिक्री गरेको हो । जसअनुसार कम्पनीले १०० रुपैयाँ अंकित दरका कुल २ लाख २५ हजार कित्ता बिक्री खुला गरेको थियो ।

धितोपत्र बिक्री प्रबन्धक कुमारी क्यापिटलका अनुसार यो आईपीओमा अन्तिम दिनसम्म कुल ३७ हजार २१९ आवेदकबाट १९ लाख ५४ हजार ६० कित्ता सेयर माग भएको थियो । मागको ८.६८ गुणा बढी हो । कुल आवेदनमध्ये ३७ हजार २०९ आवेदकबाट परेको १९ लाख ५३ हजार ८५० कित्ता सेयर सदर भएको छ भने १० आवेदकबाट परेको २१० कित्ता सेयर बदर भएको छ । मागभन्दा बढी आवेदन परेकै कारण यो आईपीओ गोलाप्रथाबाट बाँडफाँट गरिएको थियो । जसमा २२ हजार ५०० आवेदकले १० कित्ताका दरले सेयर पाएका छन् ।

सदर आवेदकमध्ये १४ हजार ७०९ आवेदकको हात खाली भएको छ । वैदेशिक रोजगारमा रहेका नेपाली आईपीओ बिक्री गरेपछि अब कम्पनीले दोस्रो चरणमा ३ प्रतिशतले हुन आउने ६७ हजार ५०० कित्ता आफ्ना कर्मचारीलाई, ५ प्रतिशतले हुन आउने १ लाख १२ हजार ५०० कित्ता सामूहिक लगानी कोषलाई र बाँकी १८ लाख ४५ हजार कित्ता सर्वसाधारणलाई बिक्री खुला गर्नेछ ।