काठमाडौं । लुकास बर्गभालको निर्णायक गोलसँगै टोटनह्यामले बुधबार इङ्लिस लिग कप सेमिफाइनलको पहिलो लेगमा लिभरपुललाई पराजित गरेको छ । १८ वर्षीय बर्गभालले ८६औं मिनेटमा डोमिनिक सोलान्केले दिएको पासमा गोल गर्दै टोटनह्यामलाई १–० को जित दिलाएका हुन् ।

यो नतिजासँगै लिभरपुलको २४ खेलसम्मको अपराजित यात्रामा पनि पूर्णविराम लागेको छ ।

छैटौं मिनेटमा टोटनह्यामका मिडफिल्डर रोड्रिगो बेन्टानकुर हेडर प्रयास गर्ने क्रममा नराम्ररी पछारिएका थिए । उनलाई १० मिनेटको उपचारपछि स्ट्रेचरमार्फत मैदानबाहिर लगिएको थियो । टोटनह्यामका प्रशिक्षक एन्ज पोस्टेकोग्लुले खेलपछि बेन्टानकुर होसमा रहेको र कुरा गर्न सक्ने अवस्थामा रहेको पुष्टि गरे । दोस्रो लेग फेब्रुअरी ६ मा एनफिल्डमा हुनेछ ।

अर्को सेमिफाइनलमा न्युक्यासलले आर्सनलविरुद्ध पहिलो लेगमा २–० को जित निकालेको छ ।