काठमाडौं । मंगलबार सेयर बजार दोहोरो अंकले बढेर बन्द भएको छ । अघिल्ला दुई कारोबार दिनमा घटेर बन्द भएको बजार आज २४ दशमलव ५० अंकले बढेर बन्द भएको हो ।

आजको कारोबार बन्द हुँदा परिसूचक २६५७ दशमलव ७७ विन्दुमा पुगेको छ । आज सेयर बजारमा कारोबार भएका कम्पनीमध्ये १७७ कम्पनीको सेयर मूल्य बढेको छ भने ६० कम्पनीको घटेको छ । त्यस्तै ६ कम्पनीको सेयर मूल्य भने स्थिर रहेको छ ।

त्यस्तै आज ‘क’ वर्गका कम्पनीको मापक सेन्सेटिभ इन्डेक्स पनि ३ दशमलव १९ अंकले बढेर ४४४ दशमलव ७२ विन्दुमा पुगेको छ । आज १३ उपसूचकमध्ये १३ वटैको सेयर मूल्य बढेको छ ।

परिसूचकसँगै आज कारोबार रकमा पनि वृद्धि भएको छ । अघिल्लो दिन ८ अर्ब ९२ करोड बढीको कारोबार भएको बजारमा आज ९ अर्ब माथिको कारोबार भएको छ । मंगलबार सेयर बजारमा ३२५ कम्पनीका १ करोड ९६ लाख ८० हजार १९५ कित्ता सेयर ९५ हजार ९७ पटक खरिद बिक्री हुँदा ९ अर्ब ४० करोड २६ लाख ७८ हजार ३३ रुपैयाँ बराबरको कारोबार भएको छ ।

मंगलबारको कारोबार बन्द हुँदा सेयर बजारमा ६ कम्पनीको सेयर मूल्यमा सकारात्मक सर्किट लागेको छ ।