काठमाडौं । निरन्तरको वर्षाका कारण उडान प्रभावित भएको छ । प्रतिकुल मौसमका कारण भिजिविलिटी कमजोर हुँदा त्रिभुवन अन्तर्राष्ट्रिय विमानस्थलबाट हुने आन्तरिक र अन्तर्राष्ट्रिय दुवै उडान सामान्य प्रभावित भएका हुन ।

खराब मौसमका कारण पोखरा, भरतपुर र सिमरा विमानस्थल आज दिउँसोसम्म ठप्प छन् । पोखरा विमानस्थलको भिजिविलिटी कमजोर भएकै कारण काठमाडौँ–पोखरा कुनैपनि उडान भएको छैन । आइतबार पोखरा–काठमाडौँ मात्र दुई उडान भएको छ । विमानस्थलका अनुसार आन्तरिकतर्फ पनि इन्ट्रयुमेन्ट फ्लाइट रुल्स (आइएफआर) उडान मात्रै भइरहेको छ ।

यसैगरी, भरतपुर, पोखरा र नेपालगञ्जको क्षेत्रीय उडान समेत प्रभावित भएको छ । यसका साथै, काठमाडौँबाट तुम्लिङटारको उडान पनि रद्द भएको छ । अन्तर्राष्ट्रियतर्फ एयर चाइनाको उडान ‘डाइभर्ट’ भएको छ । यसैगरी, अन्य अन्तर्राष्ट्रिय उडान पनि ‘डिले’ भएका छन् । जल तथा मौसम विज्ञान विभाग, मौसम पूर्वानुमान महाशाखाका अनुसार हाल देशभर मनुसुनी वायुको प्रभाव छ ।

मनसुनको न्यून चापीय रेखा सरदर स्थानको दक्षिणतिर अवस्थित रहेकाले हाल देशभर आंशिकदेखि साधारणतया बदली रही कोशी, बागमती, गण्डकी र लुम्बिनी प्रदेशका थोरै स्थानहरुमा तथा बाँकी प्रदेशको एकदुई स्थानमा हल्कादेखि मध्यम वर्षा भइरहेको छ । साथै कोशी र गण्डकी प्रदेशका एक–दुई स्थानमा भारी वर्षाको पनि सम्भावना पनि महाशाखाले पूर्वानुमान गरेको छ ।