काठमाडौं । नेपाल उद्योग वाणिज्य महासंघका वरिष्ठ उपाध्यक्ष अन्जन श्रेष्ठले नेपालमा बस्ने वातावरण नै छैन भन्ने भाष्य निर्माण भइरहेको बताएका छन् । विद्युत महसुलको समस्या समाधान गर्नुपर्ने भन्दै व्यवसायीहरुले आयोजना गरेको पत्रकार सम्मेलनमा उनले यस्तो बताएका हुन् ।

नेपालमा बस्नका लागि व्यथिति हुन नहुने उनको भनाइ थियो । महासंघको कार्यवाहक अध्यक्ष पनि रहेका श्रेष्ठले लामो समयसम्म सरकारले एउटा समस्या पनि समाधान गर्न नसकेको भन्दै यसमा सरकारले ध्यान दिनुपर्ने बताए । ‘व्यवसायीहरुले प्रमाण बिना रकम भुक्तानी नगर्ने भनिरहेका छन् । यसमा सरकारले विद्युत प्रयोग भएको प्रमाण पठाएको भए यो समस्या लम्बिने थिएन्,’ उलने भने । ९ वर्षसम्म एउटा विद्युतको समस्या समाधान नहुन दुःखद भएको भन्दै यसले लगानीको वातावरणमा प्रतिकुल असर गर्ने उनको भनाइ छ ।

व्यवसायीलाई हेर्ने दृष्टिकोणमा परिवर्तन हुन नसकेको उनले बताए । व्यवसायीलाई खाली लान्छना लगाउने काम मात्रै भएको वरिष्ठ उपाध्यक्ष श्रेष्ठको भनाइ छ । यो समस्या समाधानका लागि महासंघले वारम्बार कुरा उठाइरहेको हो । कानुुनी आयोग पनि बन्यो । आयोगले भनेको कुरालाई मान्न व्यवसायीहरु तयार छन् । सोहीअनुसार अघि बढ्नुपर्छ,’ उनले भने ।