काठमाडौं । अमेरिकामा डोनाल्ड ट्रम्प राष्ट्रपति भएपछि घट्न थालेको सुनको मूल्य पुनः बढ्न थालेको छ । गत हप्ता केही घटेको सुनको मूल्य यो हप्ता फेरि बढ्न थालको हो । नेपाल सुनचाँदी व्यवसायी महसांघका अनुसार यो साता नेपाली बजारमा सुनको मूल्य ५ हजार ४०० रुपैयाँले महंगो भएको हो ।

गत साताको अन्तिम कारोबार दिन शुक्रबार प्रतितोला १ लाख ६० हजार १०० रुपैयाँमा कारोबार भएको छापावाला सुनको मूल्य यो साताको अन्तिम कारोबार दिन शुक्रबारसम्ममा आइपुग्दा १ लाख ६५ हजार ५०० रुपैयाँमा पुगेको छ । यो साताको सबै ६ दिन नै सुनको मूल्य बढेको छ । अन्तराष्ट्रिय बजारमा समेत प्रतिआउन्स २ हजार ६०० डलरभन्दा तल झरेको सुनको मूल्य अहिले प्रतिआउन्स २ हजार ७०० डलर नजिक पुगिसकेको छ । यसले गर्दा नेपाली बजारमा पनि सुनको मूल्य लगातार रुपमा बढेको महासंघको भनाइ छ ।

सुनको मूल्य बढ्नुका कारण सुनमा लगानी बढ्नु, अन्तर्राष्ट्रिय बजारमा नै मूल्य बृद्धि हुनु, बैंकहरुको व्याजदरले पनि भूमिका खेलेको र अन्तर्राष्ट्रिय द्वन्द्व बढ्नु लगायतलाई कारण मानिएको छ । यस साता चाँदीको मूल्य समेत तोलामा ३० रुपैयाँले बढेको छ । अघिल्लो साता प्रतितोला १ हजार ९१० रुपैयाँ रहेको चाँदीको मूल्यो यो साताको अन्तिम कारोबार दिन शुक्रबार १ हजार ९४० रुपैयाँ तोला पुगेको छ ।