काठमाडौं । लाइफ इन्स्योरेन्स कर्पोरेशन (नेपाल) को हकप्रद सेयरमा आवेदन खुलेको छ । कम्पनीले आज मंसिर १२ गतेदेखि हकप्रद सेयर निष्काशन खुला गरेको हो ।

कम्पनीले चुक्तापुँजीको ८८.४५ प्रतिशत अर्थात १ः०.८८४५ रेसियोको हकप्रद खुल्ला गरेको हो । कम्पनीले २ अर्ब ३४ करोड ६८ लाख रुपैयाँबराबरको प्रतिसेयर १०० रुपैयाँ अंकित मूल्यका २ करोड ३४ लाख ६८ हजार कित्ता हकप्रद सेयर निष्कासन गरेको छ । एलआइसी नेपालले ८८.४५ प्रतिशत हकप्रद सेयर बिक्री गर्न कात्तिक ९ गते बुक क्लोज गरेको थियो । तसर्थ कात्तिक ८ गतेसम्म कायम सेयरधनीहरूले मात्र कम्पनीको हकप्रद शेयरमा आवेदन दिन पाउछन् ।

हकप्रद सेयर निष्कासनका लागि कम्पनीले नेपाल एसबीआई मर्चेन्ट बैंकिङलाई बिक्री प्रबन्धक नियुक्त गरेको छ । हाल यस कम्पनीको चुक्ता पुँजी २ अर्ब ६५ करोड ३२ लाख रुपैयाँ रहेको छ । हकप्रद सेयर जारी भई बाँडफाँड भएपछि चुक्ता पुँजी ५ अर्ब रुपैयाँ पुग्नेछ ।