काठमाडौं । नेपालको विदेशी मुद्राको सञ्चिति साढे १७ महिनासम्मको वस्तु आयात धान्न पर्याप्त रहेको देखिएको छ। नेपाल राष्ट्र बैंकले सार्वजनिक गरेको चालु आर्थिक वर्ष २०८१/८२ को ११ महिनासम्म (जेठ मसान्त) को तथ्यांक अनुसार, कुल विदेशी विनिमय सञ्चिति २५.९ प्रतिशतले वृद्धि भई २५ खर्ब ६९ अर्ब ३८ करोड रुपैयाँ पुगेको छ। अघिल्लो वर्ष २०८१ असार मसान्तमा यो सञ्चिति २० खर्ब ४१ अर्ब १० करोड रुपैयाँ थियो।

यही अवधिमा अमेरिकी डलरमा गणना गर्दा सञ्चिति २२.२ प्रतिशतले बढेर १८ अर्ब ६५ करोड पुगेको छ, जुन अघिल्लो वर्षको १५ अर्ब २७ करोड डलर थियो। ११ महिनाको आयातलाई आधार मान्दा, बैंकिङ प्रणालीसँग रहेको विदेशी विनिमय सञ्चिति १७.६ महिनासम्मको वस्तु आयात र १४.७ महिनासम्मको वस्तु तथा सेवा आयात धान्न पर्याप्त रहेको छ।

२०८२ जेठ मसान्तसम्म विदेशी विनिमय सञ्चितिको अनुपात कुल गार्हस्थ्य उत्पादनमा ४२.१ प्रतिशत, कुल आयातमा १२२.९ प्रतिशत र विस्तृत मुद्राप्रदायमा ३४.१ प्रतिशत रहेको छ। यी अनुपातहरू अघिल्लो वर्ष २०८१ असार मसान्तमा क्रमशः ३५.८ प्रतिशत, १०८.६ प्रतिशत र २९.३ प्रतिशत रहेका थिए।