काठमाडौं । सेयर बजार पछिल्ला तीन दिन लगातार रुपमा उच्च अंकले बढेर कारोबार भएको छ । साताको सेयर कारोबार हुने अन्तिम दिन बिहीबार सेयर बजार परिसूचक ७५ दशमलव ८४ अंकले बढेर २८७० दशमलव ६३ विन्दुमा पुगेको हो ।

आज सेयर बजार अघिल्लो दिनको भन्दा २.७१ प्रतिशतले वृद्धि भएको हो । आज सेयर बजारमा कारोबार भएका कम्पनीहरुमध्ये २३९ कम्पनीको सेयर मूल्य बढेको छ भने ९ वटा कम्पनीको सेयर मूल्य घटेको छ । त्यस्तै आज ‘क’ वर्गका कम्पनीको मापक सेन्सेटिभ इन्डेक्स पनि आज ११ दशमलव २२ अंकले बढेर ५०० दशमलव ४९ विन्दुमा पुगेको छ । आज सेयर बजारमा १३ वटै उपसूचकको सेयर मूल्य बढेको छ ।

परिसूचकसँगै कारोबार रकममा पनि आज वृद्धि भएको छ । अघिल्लो दिन १४ अर्ब माथिको कारोबार भएको बजारमा आज साढे १६ अर्ब भन्दा माथिको कारोबार भएको हो । आज सेयर बजारमा ३११ कम्पनीका ३ करोड ८६ लाख ३४ हजार ३५० कित्ता सेयर १ लाख ४१ हजार ४३४ पटक खरिद बिक्री हुँदा १६ अर्ब ५९ करोड २१ लाख ५ हजार ४५५ रुपैयाँ बराबरको कारोबार भएको छ ।
आज कारोबार भएका कम्पनीमध्ये ३ वटा कम्पनीको सेयर मूल्यमा सकारात्मक सर्किट लागेको छ ।