काठमाडौं । एनएमबी बैंक लिमिटेडको नाफामा उल्लेख्य सुधार देखिएको छ । बैंकले सार्वजनिक गरेको गत आर्थिक वर्ष २०८२/८३ को चौथो त्रैमासिकसम्मको अपरिष्कृत वित्तीय विवरण अनुसार नाफामा उल्लेख्य सुधार आएको हो ।

बैंकले सार्वजनिक गरेको विवरण अनुसार गत आर्थिक वर्ष नाफा, ब्याज आम्दानी र कुल व्यवसाय विस्तारमा उत्साहजनक सुधार देखिएको छ । बैंकले गत असार मसान्तसम्ममा ४ अर्ब १ करोड रुपैयाँ खुद नाफा आर्जन गरेको छ । यो अघिल्ले आर्थिक वर्षको भन्दा ४०.६० प्रतिशतले धेरै हो । बैंकको यस्तो नाफा अघिल्लो आर्थिक वर्षको सोही अवधिमा २ अर्ब ८५ करोड रुपैयाँ रहेको थियो ।

बैंकको खुद ब्याज आम्दानी ८ अर्ब २ करोड रुपैयाँबाट १७.५२ प्रतिशतले बढेर ९ अर्ब ४२ करोड रुपैयाँ पुगेको छ । त्यस्तै, बैंकको फि तथा कमिसन आम्दानी २ अर्ब १४ करोड रुपैयाँबाट बढेर २ अर्ब ५९ करोड रुपैयाँ पुगेको छ भने सञ्चालन नाफा अघिल्लो आर्थिक वर्षको ४ अर्ब ७३ करोड रुपैयाँबाट २९.०६ प्रतिशतले बढेर ६ अर्ब ११ करोड रुपैयाँ पुगेको छ।
राष्ट्र बैंकको नियम अनुसार विभिन्न कोषहरूमा रकम छुट्ट्याएपछि बैंकको नियामक समायोजन अघिको नाफा २ अर्ब ५१ करोड रुपैयाँ रहेको छ । बैंकको वितरणयोग्य नाफा १ अर्ब ८७ करोड रुपैयाँ रहेको छ भने अविमोच्य असञ्चिति अग्राधिकार सेयरको लाभांश घटाएपछि साधारण सेयरधनीका लागि १ अर्ब ७५ करोड रुपैयाँ उपलब्ध रहेको छ । यस अनुसार साधारण सेयरधनीहरूका लागि प्रतिसेयर वितरणयोग्य नाफा ९ रुपैयाँ ८ पैसा कायम भएको छ ।

गत आर्थिक वर्षको अन्त्यसम्ममा बैंकको चुक्ता पूँजी २२ अर्ब २८ करोड ५० लाख रुपैयाँ रहेको छ । सञ्चित नाफा र अन्य जगेडा कोष गरी बैंकको कुल जगेडा कोष १५ अर्ब ७७ करोड रुपैयाँ पुगेको छ । त्यस्तै, बैंकको ग्राहक निक्षेप २ खर्ब ८० अर्ब ९२ करोड रुपैयाँबाट बढेर ३ खर्ब १५ अर्ब ११ करोड रुपैयाँ पुगेको छ। बैंकले ग्राहकहरूलाई प्रवाह गरेको कर्जा २ खर्ब २८ अर्ब ४५ करोड रुपैयाँबाट बढेर २ खर्ब ४९ करोड ७५ लाख रुपैयाँ पुगेको छ ।

बैंकको निष्कृय कर्जा समीक्षा अवधिमा ४.११ प्रतिशतबाट बढेर ४.९१ प्रतिशत पुगेको छ । समीक्षा अवधिमा बैंकको प्रतिसेयर आम्दानी २० रुपैयाँ १८ पैसा र प्रतिसेयर नेटवर्थ १८१ रुपैयाँ १५ पैसा रहेको छ ।