काठमाडौं । झापा इनर्जी लिमिटेडले सर्वसाधारणका लागि बिक्री खुला गरेको आईपीओमा आवेदन दिने आज अन्तिम दिन रहेको छ । कम्पनीले भदौ २० गतेदेखि बिक्री खुला गरेको आईपीओमा आज (भदौ २४ गते) साँझ ५ बजेसम्म मात्रै आवेदन दिन सकिने छ ।

कम्पनीले यसअघि आयोजना प्रभावित क्षेत्रका स्थानीय र वैदेशिक रोजगारीमा रहेका नेपालीका लागि छुट्याइएका सेयर बाँडफाँट गरेपछि आम सर्वसाधारणका लागि आईपीओ बिक्रीमा ल्याएको हो । कम्पनीले आयोजना प्रभावित स्थानीय बासिन्दाका लागि ३ लाख ८० हजार १९० कित्ता र विदेशमा कार्यरत नेपालीका लागि ५७ हजार २९ कित्ता सेयर निष्काशन गरेको थियो । दोस्रो चरणमा सामूहिक लगानी कोषलाई २८ हजार ५१४ कित्ता र कर्मचारीलाई ११ हजार ४०६ कित्ता छुट्याइएको छ । बाँकी ४ लाख ७३ हजार ३३६ कित्ता सेयर भने सर्वसाधारण लगानीकर्ताले खरिद गर्न पाउनेछन् । उक्त सेयर प्रतिकित्ता १०० रुपैयाँ अंकित मूल्यका खरिद गर्न सकिने छ । जसको कुल मूल्य ४ करोड ७३ लाख ३३ हजार ६०० रुपैयाँ हुन्छ।

लगानीकर्ताले न्यूनतम १० कित्तादेखि अधिकतम ५ हजार कित्तासम्म आवेदन दिन सक्नेछन् । झापा इनर्जीले सञ्चालनमा ल्याएको १० मेगावाट क्षमताको ग्रीडसँग जोडिएको सौर्य विद्युत आयोजनाको अनुमानित लागत ८७ करोड ९० लाख रुपैयाँ रहेको छ । यसका अनुसार प्रतिमेगावाट लागत ८ करोड ७९ लाख रुपैयाँ पर्छ । आयोजनाको विद्युत अनुमतिपत्र अझै २२ वर्ष बाँकी छ ।

कम्पनीको सेयर निष्काशन तथा बिक्री प्रवन्धकमा हिमालयन क्यापिटल लिमिटेड रहेको छ । लगानीकर्ताले आस्बा सदस्य बैंक तथा वित्तीय संस्थाका शाखा कार्यालय वा सिडिएस एण्ड क्लियरिङ लिमिटेडको ‘मेरो सेयर’ अनलाइन प्रणालीमार्फत सि–आस्बा प्रयोग गरी आवेदन दिन सक्नेछन् ।