काठमाडौं । एसिया कप २०२५ को उपाधि भारतले जितेको छ । आइतबार भएको फाइनामा पाकिस्तानलाई ५ विकेटले हराउँदै भारत च्याम्पियन भएको हो ।

जितका लागि १४७ रनको विजयी लक्ष्य पछ्याएको भारतले १९.४ ओभरमा ५ विकेट गुमाउँदै पूरा गर्यो । भारतका तिलक बर्माले सर्वाधिक ६९ रनको अविजित पारी खेले  । मध्यगतिका बलर फहिम अशरफले दोस्रो ओभरको पहिलो बलमा ओपनर अभिषेक शर्मालाई ५ रनमा हरिस रौफबाट क्याच गर्दै महत्वपूर्ण सफलता दिलाएका थिए । खराब लयबाट गुज्रिएका कप्तान सूर्यकुमार यादव फाइनलमा शाहिन शाह अफ्रिदीको बलमा एक रनमा कप्तान सलमान अली अघाबाट क्याच आउट हुन पुगे । शुभमन गिल पनि १२ रनको व्यक्तिगत स्कोरमा आउट भए पछि भारत एक समय निकै दयनी अवस्था २०–३ को अवस्थामा पुगेको थियो ।

त्यसपछि सञ्जु स्यामसन र तिलक बर्माले ५७ रनको साझेदारी गर्दै भारतलाई खेलमा फर्काएका थिए । सञ्जु २४ रनमा आउट भए । शिबम दुबेले ३३ रनको महत्वपूर्ण पारी खेले । पाकिस्तानका फहिम अशरफले ३ विकेट लिए । शाहिन शाह अफ्रिदीले र अब्रार अहमदले समान १—१ विकेट लिए ।

दुबई क्रिकेट रंगशालामा टस हारेर पहिला ब्याटिङको निम्तो पाएको पाकिस्तान १९.१ ओभरमा १४६ रनमा अल आउट भयो । एक समय १२.४ ओभरमा ११३–१ को अवस्थामा रहेको पाकिस्तानका ब्याटरले स्पिन खेल्न नसकेपछि बाँकी ३३ रन जोड्न ९ विकेट गुमाएपछि विशाल योगफलको अवसर गुमाएको हो । पाकिस्तानका ओपनर शहिबजादा फरानले सर्वाधिक ५७ रन बनाए । उनको यो भारतविरुद्ध लगातार दोस्रो अर्धशतक हो ।