घरेलु टोली नेपाल साफ यु–२० च्याम्पियनसिपमा समूह ‘ए’ को विजेता बनेको छ । सातदोबाटोस्थित एन्फा कम्प्लेक्समा बिहीबार भएको समूहचरणको अन्तिम खेलमा बंगलादेशलाई २–१ ले पराजित गर्दै समूह विजेताका रुपमा अन्तिम चारमा स्थान बनाएको हो ।

नेपालको जितमा समीर तामाङ र निराजन धामीले गोल गरे । बंगलादेशका मिराजुल इस्लामले फर्काएको गोल सान्त्वना रह्यो । १७औं मिनेटमै नेपालले सुरुआती अग्रता लियो । त्यसको दुई मिनेटपछि नै निराजन धामीले अर्को गोल थपे । पहिलो हाफ सकिन तीन मिनेट बाँकी रहँदा मिराजुल इस्लामले बंगलादेशलाई खेलमा फर्काउने प्रयास गरे । तर त्यस पछिको खेलमा दुवै टोलिबाट गोल हुन सकेन र नेपाल विजयी भयो ।

नेपालले पहिलो खेलमा श्रीलंकालाई १–० ले पराजित गरेको थियो । बंगलादेशले पनि श्रीलंकालाई २–० ले पराजित गरेको थियो । नेपाल र बंगलादेश यसअघि नै सेमिफाइनलमा प्रवेश गरिसकेका थिए । लगातार दोस्रो जितसहित नेपाल ६ अंक जोड्दै समूह विजेता बन्यो । तीन अंक जोडेको बंगलादेश समूह उपविजेता बन्दै अन्तिम चारमा पुगेको छ ।

यो समूहबाट श्रीलंका भने अंकविहीन रहदै समूह चरणबाट बाहिरिएको छ । नेपालले फाइनल प्रवेशका लागि अर्को समूहको उपविजेतासँग खेल्ने छ । समूह ‘बी’ मा एक खेल खेल्न बाँकी रहेको भारत तीन अंकसहित शीर्ष स्थानमा छ । दुवै खेल खेलिसकेको भुटानको पनि तीन अंक रहेको छ । शुक्रबार हुने  समूह ‘बी’को अन्तिम खेलबाट नेपाल र बंगलादेशको प्रतिद्वन्दी तय हुनेछ ।