काठमाडौं । नेपाल प्रिमियर लिग (एनपीएल) अन्तर्गत समूह चरणको अन्तिम खेलमा कर्णाली याक्सले जित निकालको छ । कर्णालीले सान्त्वना जित निकाल्ने क्रममा साविक विजेता जनकपुर बोल्ट्सलाई ३ रनले पराजित गरेको हो ।

कर्णालीले दिएको १३० रनको लक्ष्य पछ्याएको जनकपुरले निर्धारीत ओभरमा ७ विकेट गुमाएर १२७ रन मात्रै बनाउन सक्यो । जनकपुरका लागि सञ्जय कृष्णमूर्तिले सर्वाधिक ५१ रनको योगदान दिए पनि टोलीको हार टार्न सकेनन् । त्यस्तै संगीत कोरेले पनि २५ रनको पारी खेले । कर्णालीका लागि विलियम बसिस्टोले दुई विकेट लिए । मार्क वाट, पवन सर्राफ, नन्दन यादव र सोमपाल कामीले समान एक विकेट लिए ।

त्यसअघि कीर्तिपुरस्थित त्रिवि क्रिकेट मैदानमा पहिले ब्याटिङ गरेको कर्णालीले ९ विकेटको क्षतिमा १२९ रन बनाएको थियो । कर्णालीका लागि ओपनर इमरान शेखले सर्वाधिक ३३ रन बनाए । त्यस्तै, गुल्सन झाले १९, प्रियांक पञ्चलले १६ र विलियम बसिस्टोले १५ रन थपे । नजिबुल्लाह जड्रान १३ रनमा आउट भए । कप्तान सोमपाल कामी १८ रनमा अविजित रहे ।

जनकपुरका लागि ललित राजवंशी र आदित्य महतले समान दुई विकेट लिए । संगीत कोरे, अनिल साह र माज सदाकतले समान एक विकेट आफ्नो नाममा गरे ।