काठमाडौं । कृषि तथा पशुपक्षी विकासमन्त्री डा मदन परियारले सरकारले आधुनिक कृषि प्रणालीमार्फत किसानको उत्पादन र आम्दानी बढाउने लक्ष्य लिएको बताएका छन् । मन्त्रालयको अर्ध वार्षिक समीक्षा कार्यक्रममा उनले मुलुकको आर्थिक समृद्धिका लागि कृषि तथा पशुपक्षी क्षेत्रलाई आत्मनिर्भर बनाउन सरकारले सेवा केन्द्र विस्तार तथा सुदृढीकरणमा जोड दिइरहेको बताएका हुन् ।

मन्त्रालयले चालु आवको अर्धवार्षिक अवधिमा हालसम्म ५५ प्रतिशत चालु तथा १२ प्रतिशत पुँजीगत खर्च गरेको उल्लेख गर्दै मन्त्री परियारले कार्यक्रम अनुसार प्राप्त बजेट कार्यान्वयन गर्न मातहतका कार्यालयलाई निर्देशन दिएका छन् । कृषि उद्यमशीलताका लागि प्रविधि तथा जलवायु स्मार्ट खेतीको अवधारणा सञ्चालन गर्नुपर्नेमा जोड दिँदै उनले मन्त्रालयले प्रभावकारी स्रोत परिचालन तथा लगानी बढाउन बलियो अन्तर एजेन्सी सहकार्य र साझेदारीको महत्त्व रहेको उल्लेख गरे ।