काठमाडौं । विद्युत नियमन आयोगले अरुण काबेली पावर लिमिटेडलाई हकप्रद सेयरनिष्कासनको पूर्वस्वीकृति प्रदान गरेको छ । वैशाख ३ गते बसेको बैठकले कम्पनीलाई हाल कायम चुक्ता पूँजी ३ अर्ब ८९ करोड ५९ लाख ४२ हजार १०० को १ः०.५ अनुपातमा १ अर्ब ९४ करोड ७९ लाख ७१ हजार ५० बराबरको हकप्रद सेयर निष्कासन गर्न स्वीकृति दिने निर्णय गरेको हो ।

कम्पनीले हकप्रद सेयरबाट संकलन हुने रकममध्ये १०० करोड काबेली बी–१ जलविद्युत आयोजना निर्माणका क्रममा लिएको ऋण भुक्तानीमा खर्च गर्ने जनाएको छ । त्यस्तै, बाँकी ९४ करोड ७९ लाख रकम काबेली इनर्जी लिमिटेड मार्फत ३७।६ मेगावाट क्षमताको काबेली ए जलविद्युत आयोजनामा लगानी गरिनेछ ।