काठमाडौं । मंगलबार सोनीले मार्भल्स वुल्भरिन सार्वजनिक गर्दैछ। यो यस वर्ष प्लेस्टेशन ५ का लागि सार्वजनिक हुने सबैभन्दा ठूलो एक्सक्लुसिभ गेम हो।

यो गेम इन्सोमनियाक गेम्सले निर्माण गरेको हो। यही स्टुडियोले पछिल्ला स्पाइडर–म्यान गेमहरू निर्माण गरेको हो, जसले पछिल्ला केही वर्षमा ५ करोड प्रति बिक्री गरिसकेका छन्।

तर सबैका प्रिय सुपरहिरो स्पाइडर–म्यानभन्दा फरक, वुल्भरिनलाई बेलायतमा पेगी–१८ (१८ वर्षमाथिका लागि) रेटिङ दिइएको छ। यसको अर्थ बालबालिकाले कानुनी रूपमा यो गेम किन्न पाउँदैनन्। गेममा ठूलो मात्रामा रगत, हिंसात्मक दृश्य र रक्तपात समावेश छन्।

सोनीका केही ठूला हिट गेम बनाइसकेको स्टुडियोका लागि यो एउटा जोखिमपूर्ण दाउ हो। अब प्रश्न उठ्छ—यो जोखिम सार्थक साबित होला त?

यो समीक्षामा गेमका सबैभन्दा महत्वपूर्ण घटनाहरू खुलासा गरिएको छैन। तर केही पात्र र सुरुवाती दृश्यबारे सामान्य स्पोइलर समावेश छन्। केही तस्बिरमा रगतका दृश्यसमेत छन्।

वुल्भरिनको भूमिकामा खेल

गेमरले लोगान अर्थात् कमिक्सका सुपरहिरो वुल्भरिनको भूमिका निर्वाह गर्छन्। उनी आफैं घाउ निको पार्न सक्ने र बाहिर निकाल्न मिल्ने धारिला नङ भएका पात्र हुन्। प्रसिद्ध पहेँलो र कालो पोसाकसहित विभिन्न पहिरनमा देखिने वुल्भरिनले ठूलो संख्यामा रहेका शत्रुसँग लड्दै अघि बढ्छन्।

गेमको युद्ध प्रणाली सहज र स्वतन्त्र शैलीको छ। वुल्भरिनले आफ्ना शत्रुलाई नङले घोच्ने र काट्ने क्रममा प्रशस्त रगत देखिन्छ। यद्यपि, केही खेलाडीलाई यो पर्याप्त हिंसात्मक नभएको पनि लाग्न सक्छ। गेममा केही स्टिल्थ अर्थात् लुकेर आक्रमण गर्ने विकल्प छन्। तर मैले त्यसलाई खासै प्रयोग गरिनँ र सीधै नङसहित शत्रुमाथि आक्रमण गरेँ। यसका लागि गेमले मलाई कुनै दण्ड दिएन।

गेम अघि बढ्दै जाँदा विभिन्न क्षमताहरू पनि खुल्दै जान्छन्, जसले पात्रलाई थप शक्तिशाली बनाउँछ। त्यसैगरी, जम्मा भएको ‘रेज’ अर्थात् आक्रोशको ऊर्जा प्रयोग गरेर आफ्नो स्वास्थ्य पुनःप्राप्त गर्न सकिने रोचक प्रणाली पनि गेममा छ।

गेमको युद्ध प्रणालीले मलाई सुरुदेखि अन्त्यसम्म आकर्षित गरिरह्यो। गेम पूरा गरेर अन्तिम क्रेडिटसम्म पुग्न मलाई करिब २० घण्टा लाग्यो। मेरा एक सहकर्मीले भने करिब १५ घण्टामै पूरा गरेका थिए।

स्पाइडर–म्यानभन्दा फरक शैली

सन् २०१८ मा स्पाइडर–म्यान सार्वजनिक हुँदा यसले सुपरहिरो गेमको नयाँ मापदण्ड स्थापित गरेको थियो। खुला विश्वको न्युयोर्क सहरमा वेब–स्लिङ्गिङ गर्दै स्वतन्त्र रूपमा घुम्न सकिने यसको विशेषता थियो।

गेम यति प्रभावशाली बन्यो कि यसलाई लिएर अनलाइनमा एउटा चर्चित मजाकसमेत चल्यो। समीक्षकहरूले गेम खेल्दा आफूलाई स्पाइडर–म्यानजस्तै महसुस भएको भन्ने उही शैलीको टिप्पणी बारम्बार गरेको भन्दै त्यसको मजाक उडाइएको थियो।

फ्रिलान्स गेम समीक्षक एमा केन्टका अनुसार गेम डिजाइनको दृष्टिले यहाँ ठूलो परिवर्तन गरिएको छ। उनका अनुसार इन्सोमनियाकले स्पाइडर–म्यानमा प्रयोग गरेको खुला विश्वको शैलीबाट टाढिँदै वुल्भरिनमा रेखीय संरचना अपनाएको छ।

यसको अर्थ खेलाडीले खुला रूपमा धेरै स्थान अन्वेषण गर्न पाउँदैनन्। बरु गेमको संसारमा अगाडि बढ्ने बाटो पहिले नै निश्चित र व्यवस्थित गरिएको छ।

अभिनय पनि उत्कृष्ट

गेममा कलाकारहरूको अभिनय पनि निकै उत्कृष्ट छ। विशेषगरी ट्रोय बेकरको अभिनय उल्लेखनीय छ। ‘द लास्ट अफ अस’मा जोएललगायत विभिन्न भूमिकाका लागि परिचित बेकरले नाथानियल एसेक्सको भूमिकामा प्रभावशाली अभिनय गरेका छन्।

वुल्भरिनको भूमिका निर्वाह गरेका लियाम म्याकइन्टायरले बीबीसी न्यूजबीटसँग कुरा गर्दै आफू गेम खेल्न दर्शकहरू उत्साहित भएको हेर्न पर्खिरहेको बताएका छन्।

उनले कथा, अभिनय र पात्रसँग मानिसहरू जोडिएकोमा आफू निकै गर्वित रहेको बताएका छन्। उनका अनुसार यो अत्यन्तै उत्कृष्ट चरित्रमा आधारित गेम हो र आफूले प्रस्तुत गरेको वुल्भरिनलाई मानिसहरूले मन पराउने उनको आशा छ।

यस सन्दर्भमा सन् २०२४ मा ‘डेडपुल एन्ड वुल्भरिन’ फिल्ममा ह्यु ज्याकम्यानले वुल्भरिनको भूमिका पुनः निभाएका थिए। उक्त फिल्मले अमेरिकामा पहिलो सप्ताहन्तमै २० करोड ५० लाख अमेरिकी डलर कमाएको थियो, जुन आर–रेटेड फिल्मका लागि अहिलेसम्मकै सबैभन्दा ठूलो सुरुवाती कमाइ थियो। यी सबै तथ्यले सोनीको वुल्भरिन गेमसम्बन्धी जोखिम पहिलो नजरमा देखिएभन्दा सुरक्षित दाउ हुन सक्ने संकेत गर्छन्।