काठमाडौं । अभिषेक शर्माको विस्फोटक ब्याटिङमा भारतले अफगानिस्तानलाई पहिलो टि ट्वान्टी अन्तर्राष्ट्रिय खेलमा ७ विकेटले पराजित गरेको छ। अफगानिस्तानले दिएको १ सय ५७ रनको लक्ष्य भारतले १३.४ ओभरमै ३ विकेट गुमाएर पूरा गर्‍यो।

भारतको जितमा अभिषेकले ३२ बलमा ८२ रनको आक्रामक इनिङ्स खेले। उनले समान ७ चौका र छक्काको वर्षा गर्दै अफगानिस्तानका बलरमाथि दबाब बनाए। इशान किशनले ३३ बलमा ४२ रन बनाए।

यसअघि टस जितेर ब्याटिङ गरेको अफगानिस्तानले २० ओभरमा ८ विकेट गुमाएर १ सय ५६ रन बनाएको थियो। अजमतुल्लाह ओमरजाईले ६४ रन बनाएपछि अफगानिस्तान सम्मानजनक योगफलसम्म पुगेको थियो। मोहम्मद नाबीले ३३ रन जोडे।

भारतका अर्शदीप सिंहले ३ विकेट लिए । चोटपछि टोलीमा फर्किएका जसप्रित बुमराह र वरुण चक्रवर्तीले पनि प्रभावशाली पुनरागमन गरे। बुमराहले खेलको दोस्रो बलमै रहमानुल्लाह गुरबाजलाई आउट गर्दै भारतलाई सुरुवाती सफलता दिलाएका थिए। त्यसपछि अफगानिस्तानका ब्याटरमाथि भारतीय बलर हाबी भए।

सदिकुल्लाह अतल र कप्तान इब्राहिम जाद्रानले केही समय इनिङ्स सम्हाल्ने प्रयास गरे पनि जाद्रान रनआउट भएपछि अफगानिस्तान दबाबमा परेको थियो। अर्शदीप, अक्षर पटेल र वरुणले लगातार विकेट निकाल्दा अफगानिस्तान ७ ओभरमा ५ विकेट गुमाएर ४३ रनको अवस्थामा पुगेको थियो।

त्यसपछि ओमरजाईले आक्रामक ब्याटिङ गर्दै अफगानिस्तानको इनिङ्स उकासे। उनले अर्धशतक पूरा गर्दै टोलीलाई १ सय ५० रन पार गराए। अन्तिम ओभरमा शिवम दुबेको बलिङमा ओमरजाईले २१ रन प्रहार गरेपछि अफगानिस्तान १ सय ५६ रनसम्म पुगेको थियो।