काठमाडौं । रसुवास्थित भोटेकोसी नदीमा गत भाद्र १० गते आएको विनाशकारी बाढीका कारण माथिल्लो त्रिशूली-१ जलविद्युत् आयोजनामा सम्पर्कविहीन भएका व्यक्तिको खोजीका क्रममा शनिबार ११ जनाको शव उद्धार गरी बाहिर निकालिएको छ।

सम्बन्धित आयोजनाका प्रतिनिधिसहित परिचालन भएको संयुक्त उद्धार टोलीले खोजी गर्ने क्रममा आयोजनाको अडिट-३ टनेल (सुरङ्ग) को जालीभित्र अल्झिएको र हिलोमा दबेको अवस्थामा शवहरू फेला पारेको हो। उद्धार टोलीले असोज ३ गते  १२:३० बजेसम्म ११ वटा शव बाहिर निकाल्न सफल भएको छ।

बाढीका कारण अझै केही व्यक्तिहरू सम्पर्कविहीन रहेकाले बाँकीको खोजी तथा उद्धार कार्य टोलीद्वारा निरन्तर जारी राखिएको छ।