काठमाडौं । नेपाल एसीसी यू–१६ इस्ट कपको फाइनमा प्रवेश गरेको छ । मेलेसियालाई ९ विकेटले पराजित गर्दै नेपाल उपाधि नजिक पुगको हो ।

लेसियाले दिएको ९१ रनको लक्ष्य नेपालले ११.४ ओभरमा १ विकेट गुमाएर पुरा गर्‍यो । परिमार्जन यादवले ५९ रनको योगदान दिए । त्यस्तै शिवान्श बजगाईंले पनि २३ रनको योगदान दिए । ओपनर प्रसिद्ध जैसी २ रनमा आउट भए । मलेसियाका लागि नागिनिश्वरमले १ विकेट लिए ।

त्यसअघि टस जितेर फिल्डिङ रोजेको नेपालले किफायती बलिङ गरेको थियो । पहिला ब्याटिङको निम्तो पाएको मलेसियाले ४३.१ ओभरमा सबै विकेट गुमाउँदै ९० रन मात्र बनाउन सक्यो । मलेसियाका मोहम्मद फतुलले सर्वाधिक ३८ रन बनाए । कप्तान डिज पार्तोले १० रनमा आउट भए । अन्य ब्याटरले दोहोरो अंकमा रन जोड्न सकेनन् ।

नेपालका अभय यादवले ४, शुभम खनालले ३ तथा कप्तान विपिनप्रसाद शर्मा र सचिन भट्टले समान १–१ विकेट लिए । गत संस्करणको फाइनलमा मलेसियालाई हराउँदै नेपाल च्याम्पियन भएको थियो । अब नेपालले उपाधिका लागि हङकङ र सिंगापुरबीचको विजेतासँग खेल्ने छ । फाइनल ५ जुलाई (असार २१) मा हुनेछ ।