काठमाडौं । वाणिज्य बैंकहरुले मंसिर महिनाका लागि नयाँ ब्याजदर सार्वजनिक गरेका छन्। मंसिर महिनाका लागि नयाँ ब्याजदर सार्वजनिक गर्ने क्रममा २० वटा वाणिज्य बैंकहरु मध्ये १० वटा वाणिज्य बैंकहरुले ब्याजदर घटाएका हुन् । १० वटा बैंकले कार्तिक महिनाकै ब्याजदरलाई निरन्तरता दिएका छन्।

वाणिज्य बैंकहरुले व्यक्तिगत मुद्दति निक्षेपको अधिकतम ब्याजदर औषतमा ०.१६ प्रतिशत विन्दु घटाएका हुन्। कार्तिक महिनामा ५.२० प्रतिशतविन्दु रहेको २० वाणिज्य बैंकहरुको औषत ब्याजदर, मंसिरका लागि घटेर ५.०४ प्रतिशत विन्दुमा झरेको छ।

मंसिरको लागि बैंकहरूले व्यक्तिगत मुद्दति निक्षेपको अधिकतम ब्याजदर ६ प्रतिशत दिने भएका छन्। औसत ब्याजदर ५ प्रतिशत छ। मंसिरको लागि अधिकतम ग्लोबल आइएमइले ६ र नेपाल बैंकले ५.२५ प्रतिशत ब्याजदर तोकेका छन्।

त्यस्तै राष्ट्रिय वाणिज्य र हिमालयन बैंकले ५.५ प्रतिशत ब्याजदर तोकेका छन् । नेपाल इन्भेष्टमेन्ट बैंक, माछापुच्छे, एनएमबी, लक्ष्मी सनराइज बैंक र एभरेष्ट बैंकको ब्याजदर स्थिर छ ।

पछिल्लो समयमा बैंकहरुले लगातार ब्याजदर घटाइरहेका छन् । बैंकिङ प्रणालीमा अधिक तरलता रहेको छ । कर्जा प्रवाह हुन नसक्दा बैंक तथा वित्तीय संस्थाहरु चलयामान हुन सकेका छैनन् । बैंकहरुमा गैरबैंकिङ सम्पत्ति बढ्दै गएको छ भने कर्जा प्रवाह न्यून रहेको छ । सरकारको नीतिगत अवरोधका कारण निजी क्षेत्र चलयामान हुन नसक्दा कर्जा प्रवाह खुम्चिएको हो । निजी क्षेत्रले चालु पुँजी कर्जा नीति खारेज गर्न माग समेत गरेका छन् । ब्याजदर घट्दै जाँदा बेसरेट पनि घट्दै जानेछ , जसले गर्दा कर्जाको ब्याजदर थप घटाउने निश्चित रहेको छ ।