काठमाडौं । नेपाल स्टक एक्सचेन्ज (नेप्से) मा सूचीकृत सात वटा कम्पनीहरूको साधारणसभा आज बस्दैछ । आज नबिल बैंक, हिमालयक लघुवित्त, डिप्रोक्स लघुवित्त, इमर्जिङ नेपाल, सिनर्जि पावर, बुटवल पावर र कालिका पावरको साधारणसभा आज बस्दै छ ।

यी सबै कम्पनीहरुले आफ्ना सेयधनीहरुलाई वितरण गर्ने लाभांश सहितका प्रस्तावहरु पारित गर्ने छन् । आज साधारणसभा गर्न लागेको नबिल बैंक लिमिटेडको १२.५ प्रतिशत नगद लाभांश पारितका लागि काठमाडौंको भद्रकालीस्थित त्रिभुवन आर्मी अफिसर्स क्लबमा बिहान ११ः१५ बजेदेखि ४१ औँ वार्षिक साधारणसभा बस्दैछ।

हिमालयन लघुवित्त वित्तीय संस्था लिमिटेडले पनि आफ्ना सेयरधनीहरुलाई ६.६५ प्रतिशत बोनस सेयर र ०.३५ प्रतिशत नगद लाभांश पारितका लागि काठमाडौंको त्रिपुरेश्वरस्थित बोगनभिल्ला इभेन्ट्समा बिहान ११ बजेदेखि १४ औँ वार्षिक साधारणसभा आयोजना गर्दैछ ।  डिप्रोक्स लघुवित्त वित्तीय संस्था लिमिटेडको २४ औँ वार्षिक साधारण सभा आज बस्दैछ ।  उक्त सभाले १० प्रतिशत बोनस सेयर र ५ प्रतिशत नगद लाभांश पारित गर्ने छ । त्यस्तै इमर्जिङ नेपाल लिमिटेडको साधारणसभाले ५.२६३१५ प्रतिशत नगद लाभांश पारित गर्ने छ । कम्पनीको १० औँ वार्षिक साधारणसभा काठमाडौंको नयाँबानेश्वरस्थित काठमाडौं ब्याङ्क्वेट प्रा.लि मा बिहान साढे ९ बजेदेखि सुरु हुने छ ।

सिनर्जी पावर डेभलपमेन्ट लिमिटेडको १० प्रतिशत बोनस सेयर र ०.५२६३ प्रतिशत नगद लाभांश पारितका लागि काठमाडौंको भाटभटेनीस्थित आम्रपाली ब्याङ्क्वेटमा बिहान ११ बजेदेखि १९ औँ वार्षिक साधारणसभा बस्दैछ। बुटवल पावर कम्पनी लिमिटेडको ६ प्रतिशत नगद लाभांश पारितका लागि काठमाडौंको बबरमहलस्थित कार्की ब्याङ्क्वेटमा दिउँसोको २ बजेदेखि २३ औँ वार्षिक साधारणसभा बस्दैछ । कालिका पावर कम्पनी लिमिटेडको ७ प्रतिशत बोनस सेयर र ०.३६८४ प्रतिशत नगद लाभांश पारितका लागि चितवनको भरतपुरस्थित दियाले फूडल्याण्डमा बिहान ११ बजेदेखि १८ औँ वार्षिक साधारणसभा बस्दैछ ।