काठमाडौं । माइकल कारिकको नेतृत्वमा म्यानचेस्टर युनाइटेडले लगातार चौथो जित निकाल्दै मुख्य प्रशिक्षकका रूपमा उनको शतप्रतिशत सुरुवात कायम राखेको छ। युनाइटेडले शनिबार टोटनहम हटस्परमाथि २–० को जित‌निकालेको छ। ब्रायन एमब्युमो र कप्तान ब्रुनो फर्नान्डेसको गोलमा जित सम्भव भएको हो ।

एमब्युमोले ३८ औं र फर्नान्डेसले ८१ औं मिनेटमा गोल गरे। जितसँगै अन्तरिम जिम्मेवारीको दोस्रो कार्यकालमा कारिकले अधिकतम १२ अंक जोडेका छन्। यो पछिल्लो सफलताले युनाइटेड २५ औं खेलको समाप्तिमा शीर्ष चारमा रहने निश्चित भएको छ। पाँचौँ स्थानमा रहेको चेल्सी र छैटौँ स्थानको लिभरपुलले यो साता विजयी हुँदा पनि युनाइटेडको स्थान सुरक्षित रहनेछ।

कारिकका पहिलो तीन जित शीर्ष दुई टोलीविरुद्ध आएको थिए। उनले ओल्ड ट्राफर्डमा दोस्रो स्थानको म्यानचेस्टर सिटीलाई हराए भने एमिरेट्स स्टेडियममा शीर्ष स्थानको आर्सनलमाथि पनि जित निकाले। त्यसपछिको खेलमा युनाइटेडले ओल्ड ट्राफर्डमै फुलहामलाई पराजित गरेका थियो।