काठमाडौं । बीमा पोलिसी नविकरण नगर्नेको संख्या १२ लाख नाघेको छ । नेपाल बीमा प्राधिकरणले सार्वजनिक गरेको तथ्यांक अनुसार १२ लाख २४ हजार ४६५ वटा बीमा पोलिसी नविकरण नभएका हुन् ।

चालु आर्थिक वर्षको १० महिनाको अवधिमा जीवन बीमा कम्पनीहरुको पोलिसी सरेण्डर रकम साढे ११ अर्ब नाघेको छ । बीमा प्राधिकरणका अनुसार चालु आर्थिक वर्षको १० महिनामा जीवन बीमा कम्पनीहरुबाट पोलिसी सरेण्डर मार्फत ११ अर्ब ६० करोड ९५ लाख रुपैयाँ बाहिरिएको हो । उक्त सरेण्डर रकम गत आवको सोही अवधिसम्मको तुलनामा भने ५.४० प्रतिशत कम हो । गत आवको १० महिनामा जीवन बीमा कम्पनीहरुबाट पोलिसी सरेण्डरमार्फत १२ अर्ब २७ करोड २३ लाख रुपैयाँ बाहिरिएको थियो ।

सरेण्डर रकमसँगै बीमालेख त्याग गर्नेको संख्या पनि गत आवको तुलनामा घटेको छ । गत आवको बैशाख मसान्तसम्ममा ८८ हजार ६३५ जनाले बीमालेख सपर्मण गरेकोमा चालु आवको सोहि अवधिमा भने ७६ हजार ४७७ जनाल मात्रै पोलिसी समर्पण गरेका छन् । यस हिसाबमा बीमालेख समर्पण संख्या १३.७२ प्रतिशतले घटेको छ ।

त्यस्तै, जीवन बीमकहरुमा व्यतित बीमालेख रकम (नविकरण नगरिएको रकम) भने ६.८३ प्रतिशतले बढेको छ । गत आवको बैशाख मसान्तसम्ममा बीमालेख नविकरण नगरिएको रकम ३६ अर्ब ८६ करोड १० लाख रुपैयाँ रहेकोमा चालु आवको सो अवधिसम्म ३९ अर्ब ३७ करोड ७४ लाख रुपैयाँ रहेको छ । यता व्यतित बीमालेखको संख्या भने २.३९ प्रतिशतले घटेको छ । समीक्षा अवधिमा १२ लाख २४ हजार ४६५ वटा बीमा पोलिसीहरु नविकरण भएका छैनन् । गत आवको सोही अवधिसम्म यस्तो संख्या १२ लाख ५४ हजार ४७८ रहेको थियो ।