काठमाडौं । श्री मोक्ष धर्म द्वीप च्यारिटीको आयोजनामा बौद्ध आध्यात्मिक सम्मान तथा दर्शन कार्यक्रम भव्य रूपमा सम्पन्न भएको छ । टुल्कु धावा नोर्बु रिन्पोछेज्युको प्रमुख आतिथ्यमा आयोजित कार्यक्रममा दक्षिण भारतको मैसुरस्थित नाम्ड्रोलिङ गुम्बामा लोसुम, धावासुम (३ वर्ष ३ महिना)को कठोर ध्यान साधना सफलतापूर्वक पूरा गरेका पाँच जना लालोप दुप्ता धर्मगुरुहरुलाई विशेष सम्मान गरिएको थियो।
सम्मानित हुने धर्मगुरुहरूमा लोपोन पेमा छिरिङ, लोपोन डावाड सेरिङ, लोपोन डिमा दोर्जे, लोपोन सांगे मिग्युर र लोपोन दोर्जे तामाङ रहेका छन् । बौद्धस्थित रामनगर पार्टी प्यालेसमा सम्पन्न कार्यक्रममा श्रद्धालु भक्तजनहरूको उल्लेख्य सहभागिता रहेको थियो। कार्यक्रममा उपस्थित भक्तजनहरूले धर्मगुरुहरूबाट दर्शन तथा आशीर्वाद ग्रहण गरेका थिए ।
च्यारिटीका अध्यक्ष लामा ल्हाक्पा दोर्जे तामाङले कठोर ध्यान साधना सफलतापूर्वक सम्पन्न गरेका धर्मगुरुहरूप्रति श्रद्धा तथा सम्मान व्यक्त गरे । कार्यक्रम सफल बनाउन उपस्थित सम्पूर्ण आभार प्रकट गरे ।
